कञ्चनपुर । कञ्चनपुरको वेदकोट, भीमदत्त र दोधारा चाँदनी नगरपालिकाका साना तथा लघुउद्यमीहरूका लागि बजार प्रणालीको विकास सम्बन्धी एकदिने तालिम प्रदान गरिएको छ। नेपाल राष्ट्रिय समाज कल्याण संघ (एनएनएसडब्लुए) र डिसिए नेपालद्वारा संयुक्त रूपमा सञ्चालित ‘सुदृढ परियोजना’ अन्तर्गत यो तालिम आयोजना गरिएको हो। विशेषगरी भीमदत्त र दोधारा चाँदनी नगरपालिकामा सन् २०२२ देखि परियोजनामार्फत सहयोग प्राप्त गर्दै आएका उद्यमीहरूलाई लक्षित गरी तालिम सञ्चालन गरिएको हो।
तालिममा कृषि, सामुदायिक वनमा आधारित उद्यम, इन्टरलक ब्लक उद्योग, होमस्टे प्रवर्द्धन, अचार उद्योग, मौरी पालन र दुना टपरी उत्पादन जस्ता विभिन्न क्षेत्रमा आबद्ध व्यवसायीहरूको सक्रिय सहभागिता रहेको थियो। सहभागीहरूलाई आफ्नो उत्पादनलाई कसरी थप प्रतिस्पर्धी बनाउने, बजारको माग र बदलिँदो वातावरण अनुसार उत्पादनमा विविधीकरण गर्ने तथा दीर्घकालीन रूपमा व्यावसायिक मुनाफा वृद्धि गर्ने विषयमा व्यवहारिक ज्ञान प्रदान गरिएको थियो।
सुदृढ परियोजनाका संयोजक राजकुमार सुनारले साना व्यवसायीहरूको व्यावसायिक क्षमता विकास गरी उनीहरूलाई तालिम बनाउन र स्थानीय अर्थतन्त्रमा टेवा पुर्याउन तालिम आयोजना गरिएको बताउनुभयो। उहाँले स्थानीय स्तरमा साना लगानीबाट सुरु भएका व्यवसायहरूलाई दिगो र मर्यादित बनाउनु नै परियोजनाको मुख्य लक्ष्य रहेको उल्लेख गर्दै यस किसिमको प्रशिक्षणले उद्यमीहरूको आत्मविश्वास बढाउनुका साथै व्यवसाय विस्तारमा ठूलो मद्दत पुग्ने विश्वास व्यक्त गर्नुभयो।
तालिममा व्यावसायिक वृद्धिका साथै जोखिम व्यवस्थापनको पक्षलाई पनि विशेष प्राथमिकता दिइएको छ। विभिन्न समयमा आउने प्राकृतिक तथा अन्य विपद्हरूबाट व्यवसायमा हुन सक्ने सम्भावित क्षतिलाई कम गर्न र लगानी जोगाउन व्यवसायीहरूलाई बीमाको महत्त्व र प्रक्रिया सम्बन्धी विस्तृत जानकारी प्रदान गरिएको आयोजकले जनाएको छ। लघुउद्यमीहरूले आफ्नो व्यवसायलाई बीमा प्रणालीमा आवद्ध गराउन सके विपद्को समयमा ठूलो आर्थिक संकटबाट बच्न सकिने विषयमा सहभागीहरूलाई सचेत गराइएको थियो।
तालिममा सहभागी उद्यमीहरूले यस किसिमको व्यवहारिक र समयसापेक्ष प्रशिक्षणबाट आफूहरू निकै लाभान्वित भएको बताएका छन्। सहभागी उद्यमीहरूले अब आफ्ना उत्पादनलाई व्यवस्थित रूपमा बजारसम्म लैजाने र विपद् जोखिमबाट बच्न बीमा प्रक्रियालाई पनि अगाडि बढाउने प्रतिबद्धता व्यक्त गरेका छन्।
Discussion about this post