काठमाडौँ विश्वका प्रदूषित सहरमध्ये चौथो स्थानमा, एक्यूआई १८१

काठमाडौँ । काठमाडौँ विश्वकै सबैभन्दा प्रदूषित सहरहरूको सूचीमा चौथो स्थानमा परेको छ। हावाको गुणस्तर मापन गर्ने ‘एअर क्वालिटी इन्डेक्स’ (एक्यूआई) अनुसार काठमाडौँको एक्यूआई १८१ मापन गरिएको छ, जुन स्वास्थ्यका लागि अस्वस्थ स्तर मानिन्छ।

एक्यूआई मापनअनुसार शून्यदेखि ५० सम्मको हावालाई राम्रो, ५१ देखि १०० सम्मलाई मध्यम, १०१ देखि १५० सम्मलाई संवेदनशील समूहका लागि अस्वस्थ, १५१ देखि २०० सम्मलाई अस्वस्थ, २०१ देखि ३०० सम्मलाई अत्यन्त अस्वस्थ र ३०० भन्दा माथिलाई खतरनाक श्रेणीमा राखिन्छ।

सूचीको पहिलो स्थानमा लाहोर रहेको छ, जहाँ एक्यूआई ५०२ पुगेको छ। दोस्रो स्थानमा ढाका (एक्यूआई २५२) र तेस्रो स्थानमा नयाँ दिल्ली (एक्यूआई २३४) रहेका छन्।

वायु प्रदूषण बढेसँगै चिकित्सकहरूले अनावश्यक रूपमा बाहिर ननिस्कन, विशेषगरी बिहानको समयमा धेरै नहिँड्न, बाहिरी व्यायाम नगर्न, झ्याल–ढोका बन्द राख्न तथा आवश्यक परे मास्क प्रयोग गर्न सुझाव दिएका छन्। विशेषगरी बालबालिका, वृद्धवृद्धा, गर्भवती महिला र श्वासप्रश्वाससम्बन्धी समस्या भएका व्यक्तिले विशेष सावधानी अपनाउनुपर्ने चिकित्सकहरूको भनाइ छ।