कञ्चनपुर । “स्वास्थ्यका लागि खेलकुद, राष्ट्रका लागि खेलकुद” भन्ने मूल नाराका साथ कञ्चनपुरको वेदकोट नगरपालिकामा छैठौँ वेदकोट नगरस्तरीय तथा १६औँ राष्ट्रपति रनिङ शिल्ड छनोट प्रतियोगिता सम्पन्न भएको छ।
विद्यार्थीहरूबीच विभिन्न खेलकुद विधामा प्रतिस्पर्धा गराई उनीहरूमा लुकेको खेल प्रतिभा छनोट गर्ने उद्देश्यले आयोजित उक्त प्रतियोगितामा २६ स्वर्ण पदक जित्दै बैजनाथ माध्यमिक विद्यालय जडेपानी प्रथम हुन सफल भएको छ। बैजनाथ माविले लगातार तेस्रो वर्ष प्रथम स्थान हासिल गरेको छ।
त्यसैगरी, ६ स्वर्णसहित भुवनेश्वरी माध्यमिक विद्यालय सिसैया द्वितीय र ५ स्वर्णसहित उदयदेव माध्यमिक विद्यालय सुन्दरपुर तृतीय भएका छन्।
वेदकोट नगरपालिका खेलकुद समितिका अध्यक्ष प्रजापति भट्टको सभाध्यक्षतामा सम्पन्न प्रतियोगिताको समापन कार्यक्रममा नगर प्रमुख भोजराज बोहरा प्रमुख अतिथि रहनुभएको थियो।
कार्यक्रमलाई सम्बोधन गर्दै प्रमुख अतिथि बोहराले खेलकुदले विद्यार्थीको शारीरिक र मानसिक विकास मात्र नभई राष्ट्रको नाम विश्वभर फैलाउन मद्दत पुऱ्याउने बताउनुभयो। उहाँले नगरपालिकाले खेल क्षेत्रलाई उच्च प्राथमिकतामा राखेको चर्चा गर्दै आगामी दिनमा उत्कृष्ट खेलाडीहरूलाई प्रोत्साहित गर्न र खेल पूर्वाधार विकासमा कुनै कसर बाँकी नराख्ने प्रतिबद्धता व्यक्त गर्नुभयो। नगर प्रमुख बोहराले विद्यार्थीहरू नै राष्ट्रका गहना भएकोले खेलकुदलाई अनुशासन र सफलताको माध्यम बनाउन आग्रह गर्दै विजयी खेलाडीहरूलाई बधाई तथा शुभकामना समेत दिनुभयो
भुवनेश्वरी माध्यमिक विद्यालय व्यवस्थापन समितिका अध्यक्ष प्रवीण बोगटीले प्रतियोगिता सफलतापूर्वक सम्पन्न गर्न सहयोग पुऱ्याउने निर्णायक, शिक्षक र सहयोगी सबैलाई धन्यवाद ज्ञापन गर्नुभयो।
कार्यक्रममा वडा सदस्य, कार्यपालिका सदस्य, स्थानीय जनप्रतिनिधि, शिक्षक तथा विद्यार्थीहरूको उल्लेख्य उपस्थिति रहेको थियो। नगरपालिकाले यस प्रतियोगिताबाट उत्कृष्ट प्रदर्शन गर्ने खेलाडीहरूलाई छनोट गरी जिल्लास्तरीय राष्ट्रपति रनिङ शिल्ड प्रतियोगिताका लागि नगरको तर्फबाट आधिकारिक टोली तयार गरिने जनाएको छ।
Discussion about this post