बैतडीः शिवनाथ गाउँपालिकास्तरीय छैटौँ राष्ट्रपति रनिङ शिल्ड प्रतियोगिता सम्पन्न भएको छ। सोमबारदेखि गाउँपालिकाको खेलमैदानमा सञ्चालन भएको प्रतियोगिता आज सफलतापूर्वक सम्पन्न भएको हो।
प्रतियोगिताको उपाधि नागार्जुन माध्यमिक विद्यालय शर्मालीले जितेको छ। नागार्जुन माविले १४ स्वर्ण, ७ रजत र ७ कास्य पदकसहित समग्र विजेता बन्न सफल भएको प्रमुख प्रशासकीय अधिकृत नरेन्द्रसिंह महताले जानकारी दिनुभयो।
यसैगरी ७ स्वर्ण, ६ रजत र ६ कास्य पदकसहित उदय माध्यमिक विद्यालय कफाडी द्वितीय तथा ३ स्वर्ण, ३ रजत र ४ कास्य पदकसहित हिरापुर माध्यमिक विद्यालय बसेडीभ्वा तृतीय भएको जनाइएको छ।
पाटन नगरपालिकाका नगर प्रमुख गौरीसिंह रावलको प्रमुख आतिथ्यमा उद्घाटन गरिएको प्रतियोगिता सभ्य र भव्य रूपमा सम्पन्न भएको गाउँपालिका अध्यक्ष कर्णसिंह साउँदले बताउनुभयो।
प्रतियोगितामा गाउँपालिकाभित्रका ९ वटा विद्यालयको सहभागिता रहेको थियो। सहभागी सबै विद्यालयले राम्रो प्रदर्शन गरेको भन्दै गाउँपालिका उपाध्यक्ष सकुन्तला साउँदले सबैलाई धन्यवाद दिँदै आगामी दिनका लागि शुभकामना व्यक्त गर्नुभयो।
Discussion about this post