गर्मीको असर न्यूनीकरण गर्न चाँदनी स्वास्थ्य केन्द्रलाई सहयोग

कञ्चनपुर । नेपाल राष्ट्रिय समाज कल्याण संघ (एनएनएसडब्ल्यूए) र मर्सी कोर नेपालको साझेदारीमा सञ्चालित समुदायका लागि जलवायु उत्थानशील (सीआरसी) परियोजना अन्तर्गत दोधाराचाँदनी नगरपालिका–स्थित चाँदनी स्वास्थ्य केन्द्रलाई सोलर प्रणाली तथा आवश्यक स्वास्थ्य सामग्री सहयोग गरिएको छ।

सीआरसी परियोजनामार्फत स्वास्थ्य केन्द्रलाई सोलर प्यानल, सोलर प्यानल स्ट्यान्ड, इनभर्टर, दुई वटा एसी तथा चार वटा थ्री–सिटर कुर्सी हस्तान्तरण गरिएको हो। गर्मी याममा अत्यधिक तातो हावा र तापक्रमका कारण स्वास्थ्य सेवा प्रवाहमा कठिनाइ हुँदै आएको अवस्थामा यो सहयोग महत्वपूर्ण मानिएको छ।

सीआरसी परियोजना संयोजक महेश घिमिरेले जलवायु परिवर्तनका कारण गर्मीको प्रभाव वर्षेनी बढ्दै गएको उल्लेख गर्दै, स्वास्थ्य केन्द्रमा निरन्तर विद्युत् आपूर्ति र सहज वातावरण सिर्जना गर्न सोलर प्रणाली जडान गरिएको बताए। यसले बिरामी र स्वास्थ्यकर्मी दुवैलाई राहत पुग्ने उनको भनाइ छ।

दोधाराचाँदनी नगरपालिकाका नगर प्रमुख किशोर लिम्बुले जलवायु परिवर्तनको असर प्रत्यक्ष रूपमा स्वास्थ्य क्षेत्रमा देखिन थालेको उल्लेख गर्दै, स्थानीय तह र संघसंस्थाबीचको सहकार्यले सेवा प्रवाह प्रभावकारी हुने बताए। उनले यस्ता कार्यक्रमले स्थानीय समुदायको स्वास्थ्य सुरक्षामा टेवा पुग्ने विश्वास व्यक्त गरे।

नेपाल राष्ट्रिय समाज कल्याण संघ (एनएनएसडब्ल्यूए) का कार्यकारी निर्देशक अशोक विक्रम जैरूले सीआरसी परियोजनामार्फत जलवायु जोखिम न्यूनीकरण गर्दै समुदायको आधारभूत सेवामा पहुँच सुधार गर्ने लक्ष्य रहेको बताए। उनले आगामी दिनमा पनि जलवायु उत्थानशील पूर्वाधार र सेवा सुदृढीकरणमा निरन्तर काम गरिने बताए।