कञ्चनपुर । भीमदत्त नगरपालिका वडा नम्बर ११ ले स्थानीय सिद्धनाथ अमर माध्यमिक विद्यालयलाई खेलकुद सामग्री तथा जर्सी वितरण गरेको छ। आगामी राष्ट्रपति रनिङ शिल्ड प्रतियोगितामा सहभागी हुने खेलाडी विद्यार्थीहरूको हौसला बढाउन वडा कार्यालयले करिब ५० हजार रुपैयाँ बराबरको सामग्री सहयोग गरेको हो।
सिद्धनाथ अमर माध्यमिक विद्यालय खेलकुदको क्षेत्रमा भीमदत्त नगरपालिकाकै अग्रणी विद्यालय मानिन्छ। यस विद्यालयले विगत चार वर्षदेखि नगर स्तरीय राष्ट्रपति रनिङ शिल्ड छनोट प्रतियोगितामा लगातार प्रथम स्थान हासिल गर्दै ‘कीर्तिमानी’ इतिहास बनाएको छ। सोही शाख जोगाउन र विद्यार्थीलाई प्रोत्साहित गर्न वडा अध्यक्ष प्रकाश थापाले जर्सी तथा विभिन्न खेलकुदका सामग्रीहरू हस्तान्तरण गर्नुभएको हो।
सामग्री हस्तान्तरण गर्दै वडा अध्यक्ष थापाले खेलकुदको विकास र युवा प्रतिभालाई प्रोत्साहन गर्नु वडाको मुख्य प्राथमिकता रहेको बताउनुभयो। “सिद्धनाथ अमर माविले खेलकुदमा बनाएको गर्विलो इतिहासलाई निरन्तरता दिन यो सानो सहयोगले मद्दत पुग्ने विश्वास लिएको छु,” अध्यक्ष थापाले भन्नुभयो, “हाम्रा खेलाडीहरूले यसपटक पनि उत्कृष्ट प्रदर्शन गरी वडा र नगरकै गौरव बढाउनेछन् भन्नेमा म विश्वस्त छु।”
विद्यालयका प्रधानाध्यापक चूडामणि जोशीले वडाको विद्यालयको समग्र विकासका लागि खेलेको योगदान अतुलनीय रहेको बताए।
त्यस्तै, खेल शिक्षक नितेश रावलले वडाको निरन्तर सहयोगले विद्यालयका खेलाडीहरूको मनोबल उच्च भएको र यसले प्रतियोगितामा अझ राम्रो नतिजा निकाल्न मद्दत पुग्ने बताउनुभयो।
वडा कार्यालयले आगामी दिनमा पनि शिक्षा र खेलकुदका क्षेत्रमा आवश्यक बजेट विनियोजन गरी यस्ता प्रोत्साहनमूलक कार्यक्रमहरूलाई निरन्तरता दिने प्रतिबद्धता जनाएको छ।
Discussion about this post