काठमाडौँ – आगामी फागुन २१ गते हुने प्रतिनिधिसभा सदस्य निर्वाचनको तयारीस्वरूप मतदाता शिक्षा कार्यक्रमका लागि नमुना मतपत्र सबै जिल्लामा पुगिसकेको निर्वाचन आयोगले जनाएको छ। आयोगका सहसचिव तथा प्रवक्ता नारायणप्रसाद भट्टराईका अनुसार मतदाता शिक्षाका लागि कूल १० लाख ९८ हजार २०० नमुना मतपत्र छपाइ गरिएको छ र ती सबै जिल्लामा वितरण भइसकेका छन्।
पहिलो हुने निर्वाचित हुने निर्वाचन प्रणाली अन्तर्गत हुम्ला, कालीकोट, जुम्ला, मुगु र डोल्पा जिल्लाका लागि आवश्यक मतपत्र छपाइ कार्य सम्पन्न भइसकेको प्रवक्ता भट्टराईले जानकारी दिनुभयो। बाँकी जिल्लाका मतपत्र क्रमशः छपाइको क्रममा रहेको आयोगले जनाएको छ।
आयोगका अनुसार यही माघ २५ गतेदेखि फागुन ५ गतेसम्म देशभरका १६५ वटै निर्वाचन क्षेत्रमा मतपत्र ढुवानी गर्ने योजना रहेको छ। यसैगरी, समानुपातिक निर्वाचन प्रणालीतर्फ करिब दुई करोडभन्दा बढी मतपत्रको छपाइ कार्य सम्पन्न भइसकेको निर्वाचन आयोगले जनाएको छ।
Discussion about this post