कृष्णपुरको नयाँबस्तीमा जैविक तटबन्ध निर्माण कार्य सुरु

कञ्चनपुर । कञ्चनपुरको कृष्णपुर नगरपालिका–२ नयाँबस्तीस्थित बन्द नदी किनारमा शुक्रबारदेखि जैविक तटबन्ध निर्माण कार्य औपचारिक रूपमा सुरु गरिएको छ। वर्षेनी बर्सातको समयमा नदी कटान, घरभित्रै पानी पस्ने र स्थानीयवासी विस्थापित हुने जोखिम बढ्दै गएको उक्त क्षेत्रमा २०० मिटरको तटबन्ध निर्माण थालिएको हो।

तटबन्ध निर्माण नेपाल राष्ट्रिय समाज कल्याण संघ (एनएनएसडब्लुए) ले मर्सीकोर नेपालसँगको साझेदारीमा सञ्चालित ‘समुदायका लागि जलवायु उत्थानशील कार्यक्रम’ अन्तर्गत, कृष्णपुर नगरपालिका र वडा नम्बर–२ संगको सहकार्यमा सुरु गरिएको हो।

स्थानिय निलम कार्कीले विगतका वर्षहरूमा नदीको बाढी घरभित्रै पसेर डुबान तथा कटानको कारण बसोबास नै संकटमा परेको बताइन्। उनले भनिन्, “वर्षात लागेपछि घरमै पानी पस्ने, कटान हुने समस्या हुन्थ्यो, अब तटबन्ध बनेपछि केही राहत मिल्ने आशा पलाएको छ।”

बन्द नदी सामुदायिक विपद् व्यवस्थापन समिति नयाँबस्तीका अध्यक्ष शिव नेपालीले पनि यस वर्षैदेखि स्थानीयस्तरमा दिगो प्रबन्धका काम देखिन थालेको उल्लेख गर्दै तटबन्धले समुदायलाई ठूलो राहत दिने बताए।

कृष्णपुर नगरपालिका–२ का वडा अध्यक्ष अर्जुनसिंह साउदले नदी कटानकै कारण अनेकौं परिवार वर्षेनी जोखिममा बस्न बाध्य भएको बताए। उनले भने, “यो नदीका कारण बर्खामा त कतिपय परिवार विस्थापित हुनुपर्ने खतरा नै हुन्थ्यो। जैविक तटबन्ध निर्माणले अब समुदाय सुरक्षित हुने अपेक्षा छ।”

यसैगरी मर्सिकोर नेपालका सुदूरपश्चिम प्रदेश संयोजक नवीनचन्द्र जोशीले कार्यक्रमले समुदायलाई दिगो र सुरक्षित बसोबासतर्फ अघि बढाउने बताए। उनका अनुसार, जैविक प्रविधिबाट तयार गरिने तटबन्ध वातावरणमैत्री, दीगो र लागत–अनुकूल हुने विशेषता राख्छ।

समुदायका लागि जलवायु उत्थानशील परियोजनाका संयोजक महेश घीमिरेले डाटा तथा स्थलगत अध्ययनपछि नयाँबस्ती क्षेत्रमा जैविक तटबन्ध अत्यावश्यक रहेको पुष्टि भएपछि काम अघि बढाइएको बताए। “स्थानीयले जनश्रमदान गर्न तयार छौं भन्ने सक्रियता देखाएपछि परियोजना, वडा कार्यालय र समुदायको सहकार्यमा निर्माण सुरु गरेका हौं,” घीमिरेले भने।