कञ्चनपुर । एनपिएलको यस वर्षको संस्करणका लागि नेपाल आउन लागेका लोकप्रिय क्रिकेट कमेन्टेटर एन्ड्र्यू लियोनर्डले नेपाल फर्किन पाउँदा आफू अत्यन्त उत्साहित रहेको बताएका छन्।
सामाजिक सञ्जालमार्फत प्रतिक्रिया दिँदै उनले भने — “यो वर्ष पहिलोपटक नेपाल फर्किन लागेकोमा म अत्यन्त उत्साहित छु। सबै ब्रॉडकास्ट टीमसँगै काम गरेर नयाँ टीयूमा अबसम्मकै सबैभन्दा ठूलो नेपाल प्रिमियर लिग आयोजना गर्न पनि निकै उत्साहित छु। म उड्न लागिरहेको छु, छिट्टै भेटौंला।”
नेपाली क्रिकेट समुदायमा अत्यधिक लोकप्रियता कमाएका लियोनर्ड लामो समयदेखि नेपाली क्रिकेटलाई अन्तर्राष्ट्रिय स्तरमा चिनाउन निरन्तर योगदान दिँदै आएका छन्। कमेन्ट्री तथा प्रस्तुतिकरणमा उनको जोशिलो शैली, खेलप्रतिको गहिरो ज्ञान र दर्शकसँग सहज रूपमा जोडिन सक्ने क्षमताले उनलाई नेपाली फ्यानहरूको मनमा विशेष स्थान दिलाएको छ।
यस वर्षको एनपिएलमा कमेन्ट्री प्यानल विशेष रूपमा बलियो हुने देखिएको छ। चर्चित भारतीय कमेन्टेटर आकाश चोपरा, दक्षिण अफ्रीकाका पूर्व क्रिकेटर हिल्टन एकरम्यान, भारतका मिखाइल भास्वानी र फजल खलिलसमेत समावेश रहने प्यानलमा लियोनर्डको उपस्थिति प्रसारणलाई झनै आकर्षक बनाउने अपेक्षा गरिएको छ।
Discussion about this post