भारतले अझै एशिया कप २०२५ को ट्रफी पाएको छैन । गएको सेप्टेम्बर २८ मा सकिएको प्रतियोगिताको ट्रफी भारतले अझै नपाएको हो ।
संयुक्त अरब इमिरेट्स (यूएई) को दुबई अन्तर्राष्ट्रिय क्रिकेट मैदानमा भएको एशिया कपको फाइनलमा खेलमा भारतले पाकिस्तानलाई हराउँदै ट्रफी जितेको थियो । एशिया कप जितेपछि भारतीय टोलीले एशियन क्रिकेट काउन्सिल (एसीसी) प्रमुख तथा पाकिस्तान क्रिकेट बोर्ड (पीसीबी) का अध्यक्ष मोहसिन नक्वीबाट ट्रफी लिन अस्वीकार गरेको थियो ।
भारतीय टोलीले नक्वीबाट ट्रफी लिन अस्वीकार गरेपछि अहिले त्यो ट्रफी दुबईमा रहेको एसीसी कार्यालयमा रहेको क्रिकेटसम्बन्धी जानकारी दिने वेबसाइट क्रिकबजले जनाएको छ ।
पीसीबीका अध्यक्ष नक्वीले एसीसीका कर्मचारीहरूलाई आफ्नो अनुमतिविना एसीसी कार्यालयबाट ट्रफी सार्न नहुने निर्देशन दिनुभएको खबरमा उल्लेख छ । दुबईमा रहेको अन्तर्राष्ट्रिय क्रिकेट काउन्सिल (आईसीसी) एकेडेमी परिसरभित्र रहेको एसीसी कार्यालयमा दुई जना कर्मचारी छन् ।
गएको सेप्टेम्बर ३० मा दुबईमा भएको एसीसीको वार्षिक साधारण सभा (एजीएम) मा एसीसी अन्तर्गतका टेस्ट खेल्ने ५ वटा देश भारत, पाकिस्तान, श्रीलङ्का, बङ्गलादेश र अफगानिस्तानले समाधान नभएको विषयमा छलफल गर्ने र निष्कर्षमा पुग्ने निर्णय गरेको थियो ।
अब अर्काे बैठक आउँदो महिनाको शुरूमा दुबईमा हुने आईसीसीको त्रैमासिक बैठकसँगै हुने तय भएको छ । तर बैठकमा पीसीबीका अध्यक्ष माेहसिन नक्वी उपस्थित नभए याे विषय थप जटिल हुन सक्छ । नक्वी उपस्थित हुने कुरामा ग्यारेन्टी छैन ।
नक्वी गएकाे जुलाईमा भएको आईसीसी वार्षिक सम्मेलनबाट टाढा बस्नुभएकाे थियाे । एसीसी भित्रका केही मानिसहरू विश्वास गर्छन् कि नोभेम्बर ४ देखि ७ सम्म तय भएको बैठकमा उहाँले फेरि एक पटक प्रतिनिधि पठाउन सक्ने सम्भावना रहेकाे एसीसीभित्रका केही मानिसहरूले बताएका छन् ।
Discussion about this post