कञ्चनपुर । संघीय मामिला तथा सामान्य प्रशासन मन्त्रालयले सार्वजनिक गरेको स्थानीय तह संस्थागत क्षमता स्वमूल्याङ्कन (लिसा) प्रतिवेदनमा कञ्चनपुरका नौवटै स्थानीय तहमध्ये वेदकोट नगरपालिका ८३.२५ अंकसहित जिल्लामै उत्कृष्ट बनेको छ।
स्थानीय तहको कार्यसम्पादन मापन गर्ने लिसा प्रतिवेदनमा शासकीय प्रबन्ध, बजेट तथा योजना व्यवस्थापन, वित्तीय अनुशासन, सेवा प्रवाह, सामाजिक समावेशीकरण, पूर्वाधार विकास, र वातावरण तथा विपद् व्यवस्थापनलगायत नौवटा सूचकका आधारमा मूल्याङ्कन गरिन्छ। यस नतिजाले कञ्चनपुरका स्थानीय तहहरूले सुशासन र विकासका विभिन्न क्षेत्रमा उल्लेख्य प्रगति गरिरहेको देखाएको छ।
लिसा प्रतिवेदनअनुसार, वेदकोट नगरपालिकापछि बेलौरी नगरपालिका ८२.५०, भीमदत्त नगरपालिका ८१.२५, लालझाडी गाउँपालिका ८१.७५, पुनर्वास नगरपालिका ८१.००, बेल्डाँडी गाउँपालिका ८१.७५ र शुक्लाफाँटा नगरपालिका ८०.०० अंकसहित उत्कृष्ट सूचीमा परेका छन्। यस्तै, कृष्णपुर नगरपालिकाले ७३.२५ र दोधारा–चाँदनी नगरपालिकाले ७१.५० अंक प्राप्त गरेका छन्।
वेदकोट नगरपालिकाले लिसामा मात्रै होइन, शैक्षिक र वित्तीय क्षेत्रमा पनि प्रभावशाली प्रगति गरेको छ। कुनै समय शैक्षिक गुणस्तरमा निकै पछाडि रहेको यस नगरपालिकाका सामुदायिक विद्यालयले पछिल्ला तीन वर्षमा शैक्षिक नतिजामा ऐतिहासिक सुधार गरेका छन्। चार वर्षअघि कक्षा १२ को नतिजा पाँच प्रतिशत मात्र रहेकोमा अहिले बढेर ५१ प्रतिशत पुगेको छ।
त्यस्तै, महालेखापरीक्षकको बासट्टिऔं वार्षिक प्रतिवेदन २०८२ अनुसार आर्थिक वर्ष २०८०/८१ मा वेदकोट नगरपालिकाले उत्साहजनक आर्थिक अनुशासन कायम गरेको पाइएको छ। कुल १७ लाख ३२ हजार २ सय ६९ रुपैयाँको लेखापरीक्षण रकममध्ये बेरुजु रकम मात्र ८ हजार २ सय ७६ रुपैयाँ रहेको छ, जुन कुल रकमको ०.४८ प्रतिशत मात्र हो। यस तथ्यांकले नगरपालिकाले वित्तीय कारोबारमा उच्च सतर्कता अपनाएको स्पष्ट हुन्छ।
वेदकोट नगरपालिकाको यो सफलताले संस्थागत क्षमता, शैक्षिक सुधार, सेवा प्रवाह, पूर्वाधार विकास र सुशासनका क्षेत्रमा स्थानीय तहहरूले गरेको प्रयास सार्थक भएको पुष्टि भएको सरोकारवालाहरूको भनाइ रहेको छ।
Discussion about this post