महेन्द्रनगर । कञ्चनपुरको भीमदत्त नगरपालिका–३ स्थित महाकाली मोडर्न पब्लिक स्कुलमा अध्ययनरत कक्षा ११ की छात्रा मनिषा चैसिरले हराएको मोबाइल सुरक्षित रूपमा विद्यालय प्रशासनलाई बुझाएर इमान्दारिताको उत्कृष्ट उदाहरण प्रस्तुत गरेकी छन्।
जेसिस विद्यालय नजिक राजीपुर जाने बाटोमा खसेको मोबाइल फोन फेला परेपछि उनले व्यक्तिगत रूपमा नराखी तत्काल विद्यालय प्रशासनलाई जिम्मा लगाएकी थिइन्। विद्यालय प्रशासनले आवश्यक खोजतलास गरी उक्त मोबाइल गैलनदी निवासी श्री पदम सिंह धामीको रहेको पुष्टि गरेपछि सुरक्षित रूपमा सम्बन्धित धनीलाई हस्तान्तरण गरेको जनाएको छ।
विद्यालयले छात्रा मनिषाले प्रदर्शन गरेको इमान्दारिता, नैतिकता र जिम्मेवारीपूर्ण व्यवहारको उच्च प्रशंसा गर्दै उनको कार्य सम्पूर्ण विद्यार्थीका लागि प्रेरणादायी भएको जनाएको छ।
विद्यालयका संस्थापक प्रिन्सिपल दिजराज भट्टले विद्यालयले विद्यार्थीलाई केवल किताबी ज्ञान मात्र नभई असल संस्कार, नैतिकता र सामाजिक उत्तरदायित्वको शिक्षा पनि प्रदान गर्दै आएको बताउनुभयो। उहाँले मनिषाले हराएको मोबाइल सुरक्षित रूपमा विद्यालयमा बुझाएर देखाएको इमान्दारिता र जिम्मेवारीले विद्यालय परिवारलाई गर्वको अनुभूति गराएको उल्लेख गर्नुभयो।
उहाँका अनुसार यस्ता सकारात्मक कार्यले विद्यालयको गरिमा अझ उँचो बनाउनुका साथै अन्य विद्यार्थीलाई पनि असल, जिम्मेवार र नैतिक नागरिक बन्न प्रेरित गर्छ। विद्यालयले छात्रा मनिषा चैसिरको उज्ज्वल भविष्यको शुभकामना व्यक्त गर्दै यस्ता संस्कारयुक्त कार्य समाजमा निरन्तर बढ्दै जाऊन् भन्ने अपेक्षा समेत व्यक्त गरेको छ।
Discussion about this post