कञ्चनपुर । नेपाल–भारत मैत्री संघ कञ्चनपुरले छिमेकी राष्ट्र भारतको ७९औँ स्वतन्त्रता दिवसको अवसरमा कञ्चनपुरका दुई विद्यालयका १०० जना विद्यार्थीहरूलाई शैक्षिक सामग्री वितरण गरेको छ।
भीमदत्त नगरपालिका–३ मा रहेको बैजनाथ माध्यमिक विद्यालय र सोही वडाको गौरीशङ्कर आधारभूत विद्यालयका विद्यार्थीहरूलाई शुक्रबार कापी र कलम वितरण गरिएको हो। नेपाल–भारत मैत्री संघ कञ्चनपुरका अध्यक्ष कृष्णप्रसाद पाठकले यो कार्यक्रम देशभर आयोजना गरिएको जानकारी दिनुभयो।
अध्यक्ष पाठकले नेपाल र भारतबीचको सम्बन्धलाई अझ प्रगाढ बनाउन तथा दुई देशबीच आवतजावत गर्दा हुने समस्या समाधानका लागि सरोकारवाला निकायहरूसँग निरन्तर छलफल गरिरहेको पनि बताउनुभयो।
यस सहयोगप्रति आभार व्यक्त गर्दै बैजनाथ माध्यमिक विद्यालयका प्रधानाध्यापक मदनबहादुर बिष्टले यस्ता कार्यक्रमले विद्यार्थीहरूलाई पढ्न थप प्रोत्साहन मिल्ने बताए। गौरीशङ्कर आधारभूत विद्यालयका प्रधानाध्यापक जगदीशप्रसाद जोशीले मैत्री संघको यो पहल प्रशंसनीय रहेको र यसले शैक्षिक विकासमा टेवा पुग्ने विश्वास व्यक्त गरे।
नेपाल–भारत मैत्री संघ कञ्चनपुरका सचिव समरजंग चन्दले शैक्षिक सामग्री वितरण कार्यक्रमले विद्यार्थीहरूको मनोबल बढाउनुका साथै उनीहरूलाई विद्यालयमा नियमित आउन प्रोत्साहन गर्ने विश्वास व्यक्त गरेका छन्।
Discussion about this post