कञ्चनपुर । जल तथा मौसम विज्ञान विभागका अनुसार आज दिउँसो देशका विभिन्न भू-भागमा वर्षाको सम्भावना रहेको छ। विशेषगरी लुम्बिनी, कर्णाली र सुदूरपश्चिम प्रदेशमा मनसुनी गतिविधि बढी सक्रिय रहने जनाइएको छ।
दिउँसोको मौसम:
लुम्बिनी, कर्णाली र सुदूरपश्चिम प्रदेशलगायत देशका पहाडी भू-भागमा सामान्य बदली रहनेछ भने बाँकी भू-भागमा आंशिक बदली रहनेछ। लुम्बिनी, कर्णाली र सुदूरपश्चिम प्रदेशका पहाडी र तराई क्षेत्रका केही स्थानहरूमा र बाँकी तराईका थोरै स्थानहरूमा हल्कादेखि मध्यम वर्षाको सम्भावना रहेको छ।
साथै, गण्डकी, लुम्बिनी, सुदूरपश्चिम र कर्णाली प्रदेशका पहाडी भू-भागका एक-दुई स्थानमा भारी वर्षाको सम्भावना पनि रहेकाले सतर्क रहन आग्रह गरिएको छ।
रातीको मौसम:
आज राती देशको पहाडी भू-भागमा सामान्य बदली रही बाँकी भू-भागमा आंशिक बदली रहनेछ। गण्डकी प्रदेशको पहाडी र तराई क्षेत्रका केही स्थानहरूमा र बागमती, लुम्बिनी र कर्णाली प्रदेशका पहाडी भू-भागमा मध्यम वर्षाको सम्भावना छ। यस्तै, मधेश प्रदेशलगायत अन्य पहाडी र तराई भू-भागका थोरै स्थानहरूमा पनि वर्षा हुन सक्नेछ।
हाल मनसुनको न्यून चापीय रेखा नेपालको पश्चिमी तराई आसपास र पूर्वी तराईभन्दा केही दक्षिणतिर रहेकोले पश्चिमी नेपालमा मनसुन बढी सक्रिय हुने देखिएको छ। यसले गर्दा पश्चिम नेपालमा वर्षाको मात्रा बढी हुने अनुमान गरिएको छ।
Discussion about this post