कञ्चनपुर – कञ्चनपुरको भीमदत्त नगरपालिका वडा नम्बर ४ मा रहेको व्यवसाय परामर्श तथा प्रशिक्षण केन्द्र (बि.सि.टि.सी.) मा ३ महिने बुटिक तालिम सम्पन्न भएको छ। तालिममा १३ जना महिलाहरूको सहभागिता रहेको थियो।
सि.टि.इ.भि.टी. बाट सम्बन्धन प्राप्त बि.सि.टि.सि.प्रा.लि.ले कञ्चनपुरमा पहिलो पटक सञ्चालन गरेको यस तालिम वैशाख १५ गतेबाट सुरु भई साउन १४ गते सम्पन्न भएको थियो।
कार्यकारी निर्देशक केदार प्रसाद भट्टका अनुसार, कम्तीमा ३ महिनाको कटाई सिलाई तालिम लिई व्यवसाय गरिरहेका १० जना महिला उद्यमीलाई लक्षित गरी तालिम सञ्चालन गरिएको थियो। २५ जनाले आवेदन दिएकोमा १३ जनालाई मात्रै प्रशिक्षण गराइएको थियो।
तालिमका प्रशिक्षक मोहन दमाईले सहभागीहरूले बजारमा माग भएका विभिन्न प्रकारका बुटिकका कामहरू सिकेको बताए।
तालिममा सहभागी शारदा भाट कार्कीले बुटिक तालिमका लागि यसअघि धनगढी वा काठमाण्डौँ जानुपर्ने बाध्यता रहेकोमा अहिले आफ्नै सहरमा सिक्न पाउँदा खुसी व्यक्त गरिन्।
झलारीबाट आएकी अर्की सहभागी खगेश्वरी कुमारी घिमिरेले पनि आफ्नो सानो कपडा सिउने व्यवसायमा बुटिकको माग बढेकाले यस तालिममा सहभागी भएको र अब बुटिकको काम गर्न आफू दक्ष भएको बताइन्।
२०७२ सालमा यसै संस्थाबाट कटाई सिलाई तालिम लिएकी र अहिले सुडामा आफ्नै व्यवसाय गरिरहेकी सम्झना चौधरीले धेरै पर्खाइपछि बुटिक तालिममा सहभागी हुन पाएकोमा खुसी व्यक्त गर्दै अब यस संस्थाले फेसन डिजाइनसम्बन्धी तालिम पनि सञ्चालन गर्ने आशा व्यक्त गरिन्।
२०६५ सालमा विधिवत रूपमा दर्ता भएको बि.सि.टि.सि.प्रा.लि.ले हालसम्म हजारौँलाई दक्ष कामदार बनाएर देश तथा विदेशमा रोजगारीको अवसर दिइसकेको कार्यकारी निर्देशक भट्टले बताए। उनले अब महेन्द्रनगरमा कुनै पनि तालिम सञ्चालन गर्दा बाहिरबाट प्रशिक्षक ल्याउनु नपर्ने गरी दक्ष प्रशिक्षकहरू पनि उत्पादन गरिसकेको जानकारी दिए।
Discussion about this post