कञ्चनपुर । कञ्चनपुरको वेदकोट नगरपालिका–०७ गाउजीस्थित जनता माध्यमिक विद्यालयको नयाँ पक्की भवनको बिहीबार शिलान्यास गरिएको छ। पूर्वमन्त्री एनपी साउदले विद्यालय भवनको शिलान्यास गरेका हुन्।
शिलान्यास कार्यक्रममा बोल्दै पूर्वमन्त्री साउदले शिक्षा क्षेत्रमा गरिएको लगानीले समृद्ध समाज निर्माणमा महत्त्वपूर्ण टेवा पुर्याउने बताएका छन्। उनले विद्यालयको पूर्वाधार विकासका लागि आफू सधैं सहयोगी भूमिका निर्वाह गर्ने प्रतिबद्धता समेत जनाए।
त्यस्तै वेदकोटका नगर प्रमुख भोजराज बोहराले विद्यालयको शैक्षिक गुणस्तर वृद्धिका लागि भौतिक पूर्वाधारको विकास अपरिहार्य रहेको बताउनुभयो । उहाँले नगरपालिका शिक्षा क्षेत्रको विकासका लागि निरन्तर लागिपरेको र यस भवनले विद्यार्थीहरूलाई थप प्रोत्साहन मिल्ने विश्वास व्यक्त गर्नुभयो ।
विद्यालय भवन शिलान्यास कार्यक्रममा वेदकोट नगरपालिकाका नगरउपप्रमुख, वडाध्यक्ष लगायतका जनप्रतिनिधि, शिक्षक, कर्मचारी र स्थानीय बासिन्दाको उल्लेख्य उपस्थिति रहेको थियो। यस नयाँ भवनले विद्यालयको शैक्षिक वातावरण सुधार गर्न र विद्यार्थीहरूलाई आधुनिक सुविधा प्रदान गर्न मद्दत पुग्ने विश्वास गरिएको छ।
Discussion about this post