मनसुनअघि विपद् जोखिम न्यूनीकरणका लागि सरकारलाई संसदीय समितिको निर्देशन

काठमाण्डौ – राष्ट्रियसभा अन्तर्गतको सङ्घीयता सबलीकरण तथा राष्ट्रिय सरोकार समितिले मनसुनअघि जोखिम अनुमान गरी पूर्वतयारी थाल्न सरकारलाई निर्देशन दिएको छ ।

आजको बैठकमा समिति सभापति सोनाम गेल्जेन शेर्पाले विपद् व्यवस्थापन र जोखिम न्यूनीकरणका सरकारी नीतिहरू प्रभावकारी रूपमा कार्यान्वयन गर्न निर्देशन दिएको बताउनुभयो । सांसदहरूले मनसुनजन्य विपद् न्यूनीकरणका लागि अग्रिम तयारीमा जोड दिए ।

राष्ट्रिय जोखिम न्यूनीकरण तथा व्यवस्थापन प्राधिकरणका कार्यकारी प्रमुख दिनेशप्रसाद भट्टले यस वर्ष औसतभन्दा बढी वर्षा हुने अनुमान रहेको बताउँदै विपद् प्रतिकार्य र तयारीका लागि तीनै तहका सरकारबीच समन्वय आवश्यक रहेको उल्लेख गर्नुभयो । उहाँले विगत १० वर्षमा नेपालमा ८,४४१ मनसुनजन्य घटना भएको जानकारी पनि दिनुभयो ।