कञ्चनपुर । भारतीय सीमा सुरक्षा बल (एसएसबी)ले कञ्चनपुरका एक नेपाली नागरिकको घर निर्माणमा अवरोध गरेको छ। एसएसबीले दशगजा क्षेत्रमा पर्ने दाबी गर्दै दोधारा चाँदनी नगरपालिका–१, पशुपति टोलका लक्ष्मण सुनारको घर बनाउन रोक लगाएको हो।
घरधनी लक्ष्मण सुनारका अनुसार तीन दिनअघि निर्माणस्थलमा पुगेको एसएसबी टोलीले यो क्षेत्र दशगजा भएको र यहाँ घर बनाएमा पछि भत्काउनुपर्ने भन्दै दबाब दिएको थियो। सुनारले गत वर्ष भोजराज अवस्थीसँग १० धुर जमिन खरिद गरी घर निर्माण सुरु गरेको बताए। उनले जग्गाको लालपुर्जा हुँदाहुँदै पनि भारतीय पक्षबाट अवरोध हुनु दुःखद भएको गुनासो गरे। एसएसबीको अवरोधपछि सुनारले घरको जग खनेर काम रोकेका छन्।
स्थानीय बासिन्दाका अनुसार उक्त क्षेत्रमा २०२३ सालदेखि नै नेपाली नागरिकको बसोबास रहेको छ। यसअघि पनि कञ्चनपुरका सीमावर्ती क्षेत्रमा एसएसबीले नेपाली नागरिकलाई घर बनाउन अवरोध गर्दै आएको थियो, जसको स्थानीय स्तरमा विरोध हुँदै आएको छ।
दोधाराचाँदनी–१ का वडाध्यक्ष विक्रम चन्दले नेपाली नागरिक लक्ष्मण दमाईको घर निर्माणमा एसएसबीले गरेको अवरोधबारे नगर प्रमुख किशोरकुमार लिम्बुलाई जानकारी गराएको बताए। उनले भने, ‘तीन दिनअघि एसएसबी आएर घर निर्माणस्थल दशगजामा पर्ने भन्दै दुई हात पर बनाउन आग्रह गरेको देखियो। उक्त स्थानमा स्पष्ट नापजाँच हुनुपर्ने देखिन्छ। नेपाली दर्तावाला जमिन कहाँसम्म हो र दशगजा कहाँबाट पर्छ भन्ने एकिन हुन जरुरी छ।’
कञ्चनपुर सीमा सुरक्षाको जिम्मा पाएको सशस्त्र प्रहरीले भने लक्ष्मण सुनारले घर निर्माण गर्न लागेको जग्गा दशगजामै पर्ने जनाएको छ। सशस्त्र प्रहरीका अनुसार सुनारले आफ्नो दर्ता भएको जग्गा छाडेर दशगजातिर घर बनाउन खोजेपछि एसएसबीले रोकेको देखिएको छ। यस विषयमा सरोकारवालाहरूसँग संयुक्त छलफल गरी विवाद निरूपण गरिने सशस्त्र प्रहरीले जनाएको छ।
यद्यपि, सुनारको घर दशगजामा पर्ने भए पनि भारतीय सीमा सुरक्षा बल (एसएसबी)ले नेपाली सुरक्षा बल सशस्त्र प्रहरीसँग समन्वय गर्नुको सट्टा सिधै अवरोध गरेको भन्दै स्थानीयस्तरमा भारतीय पक्षले नेपालमाथि हेपाहा प्रवृत्ति देखाएको आरोप लागेको छ।
Discussion about this post