यस्तो छ आजको मौसम

कञ्चनपुर – हाल नेपालमा पश्चिमी वायु, स्थानीय वायु, साथै बङ्गालको खाडी र अरब सागरबाट आएको जलवाष्पयुक्त हावाको आंशिक प्रभाव रहेको मौसम पूर्वानुमान महाशाखाले जनाएको छ।

दिउँसोको मौसम:
आज दिउँसो कोशी र सुदूरपश्चिम प्रदेशसहित देशका पहाडी भू-भागमा आंशिकदेखि साधारणतया बदली रहनेछ भने बाँकी क्षेत्रमा मौसम मुख्यतः सफा देखि आंशिक बदली रहने छ। कोशी र गण्डकी प्रदेशका पहाडी भेगका थोरै स्थानमा, साथै अन्य पहाडी क्षेत्रका एक-दुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ। उच्च-पहाडी र हिमाली क्षेत्रका एक-दुई स्थानमा हल्का वर्षा वा हिमपात हुन सक्ने अनुमान छ।

रातिको मौसम:
आज राति कोशी, बागमती, गण्डकी र कर्णाली प्रदेशका पहाडी भू-भागमा आंशिकदेखि साधारणतया बदली रहनेछ भने अन्य क्षेत्रमा मौसम मुख्यतः सफा देखि आंशिक बदली रहने छ। कोशी, बागमती र गण्डकी प्रदेशका पहाडी भेगका एक-दुई स्थानमा मेघगर्जन र चट्याङसहित हल्का वर्षाको सम्भावना छ। यस्तै, कोशी, बागमती, गण्डकी र कर्णाली प्रदेशका उच्च-पहाडी तथा हिमाली क्षेत्रका एक-दुई स्थानमा हल्का वर्षा वा हिमपात हुन सक्ने मौसमविद्हरूले बताएका छन्।

मौसमको यो प्रभावले विशेषगरी पहाडी र हिमाली क्षेत्रमा यात्रा गर्ने तथा कृषि कार्यमा संलग्न व्यक्तिहरूलाई सतर्क रहन महाशाखाले आग्रह गरेको छ।