कञ्चनपुर – हाल देशमा पश्चिमी वायु, स्थानीय वायु र अरब सागरबाट आएको जलवाष्पयुक्त हावाको आंशिक प्रभाव रहेको मौसम पूर्वानुमान महाशाखाले जनाएको छ। यसका कारण आज र राति देशका विभिन्न भू-भागमा मौसममा विविधता देखिने छ।
दिउँसोको मौसम: कोशी प्रदेशसहित देशका पहाडी भू-भागमा आंशिकदेखि साधारणतया बदली रहने छ भने बाँकी क्षेत्रमा मौसम मुख्यतया सफा देखि आंशिक बदली रहने छ। कोशी र गण्डकी प्रदेशका पहाडी भेगका केही स्थानमा मेघगर्जन र चट्याङसहित हल्का वर्षाको सम्भावना छ। साथै, उच्च-पहाडी र हिमाली क्षेत्रका एक-दुई स्थानमा हल्का वर्षा वा हिमपात हुन सक्ने अनुमान छ।
रातिको मौसम: कोशी प्रदेशसहित पहाडी भू-भागमा आंशिक बदली रहने र बाँकी क्षेत्रमा मौसम मुख्यतया सफा रहने छ। कोशी, गण्डकी र कर्णाली प्रदेशका पहाडी भेगका एक-दुई स्थानमा मेघगर्जन र चट्याङसहित हल्का वर्षा हुन सक्छ। यी प्रदेशका उच्च-पहाडी र हिमाली क्षेत्रमा पनि हल्का वर्षा वा हिमपातको सम्भावना रहेको छ।
मौसमविद्हरूले चट्याङबाट बच्न र उच्च हिमाली क्षेत्रमा यात्रा गर्दा सतर्कता अपनाउन आग्रह गरेका छन्।
Discussion about this post