कञ्चनपुर । कञ्चनपुरको भीमदत्त नगरपालिका वडा नम्बर १८ भासीमा अवस्थित जन्जयोति माध्यमिक विद्यालयले नयाँ शैक्षिक सत्रका लागि भर्ना भएका विद्यार्थीहरूलाई स्वागत गरेको छ। मङ्गलवार विद्यालय प्राङ्गणमा आयोजित एक विशेष कार्यक्रममार्फत १६१ जना नयाँ विद्यार्थीहरूलाई स्वागत गरिएको हो।
कार्यक्रममा विद्यालयका प्रधानाध्यापक सुरेन्द्र राज जोशीले नयाँ विद्यार्थीहरूलाई हार्दिक स्वागत गर्दै उनीहरूको उज्ज्वल भविष्यको कामना गरे। उनले विद्यालयको उद्देश्यबारे प्रकाश पार्दै भने, “हाम्रो मुख्य उद्देश्य समाजलाई चाहिने दक्ष, सक्षम र नैतिकवान् जनशक्ति उत्पादन गर्नु हो। हामी विद्यार्थीहरूलाई गुणस्तरीय शिक्षा, अनुशासन र जीवनोपयोगी सीप प्रदान गर्न प्रतिबद्ध छौँ।”
कार्यक्रममा विद्यालय व्यवस्थापन समितिका पदाधिकारी, शिक्षक, अभिभावक र विद्यार्थीहरूको उपस्थिति रहेको थियो। नयाँ विद्यार्थीहरूलाई प्रमाण पत्र प्रदान गरी अबिर लगाएर स्वागत गरिनुका साथै उनीहरूलाई विद्यालयको नियम, शैक्षिक वातावरण र गतिविधिबारे जानकारी दिइएको थियो।
विद्यालयले नयाँ शैक्षिक सत्रमा शैक्षिक गुणस्तर वृद्धिका लागि विभिन्न नवीन योजना अघि सारेको जनाएको छ। यस्ता योजनाहरूमा अतिरिक्त कक्षा, प्राविधिक शिक्षा, रचनात्मक गतिविधि र विद्यार्थीहरूको सर्वाङ्गीण विकासमा जोड दिने कार्यक्रमहरू समावेश छन्।
जन्जयोति माध्यमिक विद्यालयले विगतदेखि नै शैक्षिक क्षेत्रमा उत्कृष्ट योगदान पुर्याउँदै आएको छ। यो स्वागत कार्यक्रमले नयाँ विद्यार्थीहरूमा उत्साह थप्नुका साथै विद्यालयको शैक्षिक प्रतिबद्धतालाई थप उजागर गरेको छ।
Discussion about this post