कञ्चनपुर – देशमा हाल पश्चिमी वायु, स्थानीय वायु र बङ्गालको खाडीबाट भित्रिएको जलवाष्पयुक्त हावाको प्रभावले मौसममा परिवर्तन आएको छ।
जल तथा मौसम विज्ञान विभागका अनुसार आज दिउँसो देशभर आंशिकदेखि साधारणतया बदली रहनेछ।पहाडी भू-भागका थोरै स्थानहरूमा र बाँकी भू-भागका एक-दुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ। साथै, हिमाली भू-भागका केही स्थानमा हल्का वर्षा वा हिमपात हुन सक्ने अनुमान छ।
रातको समयमा पहाडी भू-भागमा आंशिकदेखि साधारणतया बदली रहने र बाँकी क्षेत्रमा मौसम मुख्यतया सफादेखि आंशिक बदली रहने विभागले जनाएको छ। पहाडी भू-भागका एक-दुई स्थानमा मेघगर्जन र चट्याङसहित हल्का वर्षा हुन सक्छ।
कोशी, बागमती र गण्डकी प्रदेशका हिमाली भू-भागमा पनि हल्का वर्षा वा हिमपातको सम्भावना रहेको छ।
मौसमको यो अवस्थाले यात्रा र दैनिक गतिविधिमा सतर्कता अपनाउन विभागले सुझाव दिएको छ।
Discussion about this post