भीमदत्त १३ मा रहेको श्री निवास रामानुज घाट तीर्थस्थलमा १५ दिन धार्मिक मेला लाग्दै

कञ्चनपुर । कञ्चनपुरको भीमदत्त नगरपालिका १३ मा रहेको श्री निवास रामानुज घाट तीर्थस्थलमा १५ दिन सम्म धार्मिक मेलाको लाग्ने भएको छ । तीर्थस्थलमा माघ १ गतेदेखि १५ गतेसम्म विभिन्न धार्मिक कार्यहरूका साथ पन्ध्र दिन सम्म चल्ने मेलाको आयोजना हुन लागेको भीमदत्त १३ का वडा अध्यक्ष राम बहादुर बोहरा (झक्कास) ले जानकारी दिनुभएको छ।

अध्यक्ष बोहराले स्वामी गोविन्द जी महाराजको करकमलबाट अनवरत रूपमा १५ दिन हिन्दु धर्मावलम्बीलाई लक्षित गर्दै धार्मिक परम्परालाई जोगाउन तथा उक्त क्षेत्रलाई धार्मिक स्थलका रूपमा परिचित गराउनका लागि श्री निवास रामानुज घाट तीर्थस्थलमा मेलाको आयोजना गरिन लागेको बताउनु भयो ।

‘यस क्षेत्रलाई धार्मिक पर्यटकीय क्षेत्रको रूपमा बिस्तार गर्न हामीले माघ १ गतेदेखि १५ गतेसम्म मेलाको आयोजना गरिरहेका छौँ।’ उहाँले भन्नुभयो ‘यो क्षेत्रमा १ हजार ८ गाईको दूधबाट अभिषेक भएको १ हजार ८ तीर्थ स्थलको जलबाट अभिषेक भएको यो पवित्र स्थल आएर धार्मिक पुण्य भूमि हो। यो ठाउँलाई धार्मिक पर्यटकीय क्षेत्रका रूपमा बिस्तार गर्न अति नै आवश्यक रहेको छ।’

श्री रामानुज भगवान्, महाकाली मैयाँ, श्री राम भगवान्, शङ्कर विराजमान भएको उक्त  तीर्थस्थलमा पवित्र उद्देश्यका साथ मेला सम्पन्न गरेर १५ गते कार्यक्रमलाई समापन गरी देवघाट जाने र त्यहाँबाट भारतको प्रयागराज जाने र धर्मको रूपमा वैदिक सनातनको रूपमा प्रचार प्रसार गर्ने योजना पनि रहेको उहाँले बताउनु भयो। साथै अध्यक्ष बोहराले सम्पूर्ण हिन्दु धर्मावलम्बीलाई उक्त तीर्थ स्थलमा आएर धर्म कमाउन समेत आग्रह गर्नुभएको छ।