बिकास सिह महता, कञ्चनपुर – कञ्चनपुरका सरोकारवाला निकायले जैविक विविधता संरक्षण गर्न प्रतिबद्धता जाहेर गरेका छन् । सोमबार मित्र समाज काठमाडौँको आयोजना, जागृती फाउण्डेसन धनगढीको समन्वय एव यूएसएआईडी दाइ अन्तर्गत जलजङ्गल परियोजनाको सहयोगमा महेन्द्रनगरमा आयोजित ‘जैविक विविधता र वातावरणीय विषयमा सरोकारवाला निकाय बीच गोलमेच बैठक’ कार्यक्रममा सरोकारवाला निकायले जैविक विविधता संरक्षणमा प्रतिबद्धता जाहेर गरेका हुन् ।
उक्त कार्यक्रममा संरक्षणका क्षेत्रमा कार्यरत सरकारी एवम् गैर सरकारी सङ्घ संस्था, प्रशासन, सुरक्षा निकाय लगायतकाका प्रतिनिधिहरूले जैविक विविधताको क्षेत्रमा जोड दिनुका साथै आ–आफ्नो क्षेत्रबाट संरक्षणमा प्रतिबद्ध रहने बताएका छन्। कार्यक्रममा सरोकारवाला निकायका प्रतिनिधिहरूले जैविक विविधता संरक्षण गर्न सकिने प्रयासहरूका बारेमा छलफल समेत गरेका थिए। सामुदायिक वन समन्वय समिति कञ्चनपुरका उपाध्यक्ष नरेश राज भट्टले संरक्षणका क्षेत्रमा नागरिकलाई सहभागिता आवश्यक रहेको बताए ।
![Mahakali Polytechnic](https://sudurpashimkhabar.com/wp-content/uploads/2024/08/Mahakali.gif)
बन संरक्षक धर्मराज पन्तले नीतिगत रूपमै वन पर्यावरण, बन्यजन्तुको सुधार आवश्यक रहेको औँल्याउँदै नीति बनाउने, कार्यान्वयन गर्ने पक्ष इमानदार हुनुपर्नेमा बताए। चुरे संरक्षण सञ्जालका अध्यक्ष रविन्द्र बहादुर कुँवरले वातावरण संरक्षण सम्बन्धित ऐन नियम कार्यान्वयनमा जोड दिए भने संरक्षण क्षेत्रमा कार्यरत देवराज जोशीले हात्तीको कोरिडोर संरक्षण गर्नुपर्ने सुझाव दिए । कञ्चनपुरका प्रहरी प्रमुख प्रहरी उपरीक्षक चक्रराज जोशीले प्रकृतिमाथि जथाभावी खेलवाड गर्न नहुने बताए भने डिभिजन वन कार्यालय कञ्चनपुरका प्रमुख भीम प्रसाद कँडेलले वन, पर्यावरण संरक्षणका लागि सरोकारवाला पक्ष नागरिकको समेत सहयोग अपरिहार्य रहेको बताउँदै जैविक विविधता संरक्षण गर्न सबैले आआफ्नो तर्फबाट लाग्नुपर्ने बताएका छन्।
![Sana Kishan](https://sudurpashimkhabar.com/wp-content/uploads/2021/01/Sana-Kishan-scaled.jpg)
शुक्लाफाँटा राष्ट्रिय निकुञ्जका सहायक संरक्षण अधिकृतले नीति नियमको पालना गरि निषेधित क्षेत्रमा आवतजावत गर्न नहुने हुँदा यसमा सम्पूर्ण मानिसले बन्यजन्तु बाट हुने घटना बाट बच्न सकिने हुँदा सबैले सजक्ता अपनाउन हुने बताए। कञ्चनपुरका प्रमुख जिल्ला अधिकारी नारायण प्रसाद सापकोटाले कानुनको प्रभावकारी कार्यान्वयन गरेर पर्यावरण संरक्षणमा टेवा पुग्ने बताए । प्रजिअ सापकोटाले कानुनको प्रभावकारी कार्यान्वयन गर्न जोड दिए ।
जिल्ला समन्वय समिति कञ्चनपुरका प्रमुख दुर्गादत्त बोहराले सबैले आ–आफ्नो क्षेत्रबाट भूमिका निर्वाहमा जोड दिए । मित्र समाजका कार्यकारी निर्देशक विवेक सिह (ठकुरी) ले कञ्चनपुरको जैविक विविधता संरक्षणमा टेवा गर्ने उद्देश्यका साथ जिल्लाका सरोकारवालासँग छलफल गरिएको बताए । संरक्षणका क्षेत्रमा कार्यरत बरिष्ठ पत्रकार पिताम्बर सिग्देलले सहजिकरण गरेको उकार्यक्रममा सरकारी तथा गैर सरकारी कार्यालयका प्रतिनिधीको सहभागिता रहेको थियो ।
![Dirghayu Ads](https://sudurpashimkhabar.com/wp-content/uploads/2024/06/Dirghayu.gif)