कञ्चनपुर, लाल बहादुर एसके । कञ्चनपुरको पुनर्वास नगरपालिकास्थित दुर्गा माध्यमिक विद्यालयका विद्यार्थीहरूलाई ट्रयाक सुट वितरण गरिएको छ । वडा अध्यक्ष मनोज जैशीको पहलमा देश तथा विदेश रहेका वडा निवासी र विभिन्न मनकारी व्यक्तिहरूको आर्थिक सहयोगमा ट्रयाक सुट वितरण गरिएको हो ।
कक्षा १२ सम्म पढाइ हुने उक्त विद्यालयमा कक्षा ५ सम्मका सम्पूर्ण विद्यार्थीहरूलाई एक-एक सेट ट्रयाक सुट उपहारस्वरूप प्रदान गरिएको पुनर्वास नगरपालिका वडा नम्बर ४ का अध्यक्ष जैशीले जानकारी दिएका छन्। साथै अध्यक्ष जैशीले वडामा रहेका विद्यालयको शैक्षिक देखि भौतिक गुणस्तर र पूर्वाधार विकासमा आफ्नो प्रयास जारी रहने बताउँदै कोटीहोमको विद्यालयमा पनि झोला वितरण गरेको बताए । अध्यक्ष जैशीले स्वदेश तथा विदेशमा रहेर उक्त कार्यमा सहयोग गर्ने सम्पूर्णमा धन्यवाद ज्ञापन गरेका छन्।
विद्यालयका प्रधानाध्यापक बिनोद चन्दले जाडो बढेसँगै बालबालिकाहरूका अभिभावक आर्थिकरूपमा विपन्न हुनुका साथै अधिकांश विद्यार्थीहरू सुकुम्बासी बस्तीबाट आउने भएकाले न्यानो लुगा पाउँदा हर्षित भएका र विद्यालय आउन सहज हुने बताउँदै विद्यालय परिवारका तर्फबाट आभारी रहेको बताए। कार्यक्रममा वडा सदस्य रेवती रमन घिमिरे, विष्णु नेपाली, विद्यालयका शिक्षक, कर्मचारी लगायतको उपस्थिति रहेको थियो ।
Discussion about this post