काठमाडौं। नेपाली कांग्रेसको १५औँ महाधिवेशनअन्तर्गत नयाँ नेतृत्व चयनका लागि भएको निर्वाचनको मतगणना शुक्रबार बिहान सम्पन्न भएको छ। मधेस र बागमती प्रदेशको अन्तिम मतपरिणाम आएसँगै असोज २३ गते रातिदेखि सुरु भएको मतगणना प्रक्रिया टुंगिएको हो।
निर्वाचन समितिका सदस्यसचिव राजु कटुवालका अनुसार लुम्बिनी, गण्डकी, उपत्यका, श्रमिक, शहीद परिवार तथा द्वन्द्वपीडित समूहबाट प्रतिनिधित्व गर्ने केन्द्रीय सदस्यहरूको मतगणना राति नै सकिएको थियो। त्यस्तै, सहमहामन्त्रीसहित खुला तथा महिला केन्द्रीय सदस्य चयन हुने विभिन्न समूहको मतगणना पनि सम्पन्न भएको उनले जानकारी दिए।
सबै पदको मतपरिणाम रुजु गर्ने काम भइरहेको र त्यसपछि औपचारिक नतिजा सार्वजनिक गर्ने तयारी गरिएको निर्वाचन समितिले जनाएको छ।
गत असोज २३ गते मतदान सम्पन्न भएपछि सोही राति सभापति पदको मतगणना सुरु गरिएको थियो। सभापतिको नतिजा असोज २४ गते बिहान सार्वजनिक भएको थियो भने अन्य पदको मतगणना पार्टी केन्द्रीय कार्यालय बीपी नगर, सानेपामा असोज २४ गते रातिदेखि गरिएको थियो।
निर्वाचन समितिका अनुसार यसपटक सात हजार ३९२ मतदाताको मत गणना एक साताभित्र सम्पन्न भएको छ। यसअघि १४औँ महाधिवेशनमा चार हजार ७०० मतदाताको मतगणना गर्न १२ दिन लागेको थियो। यसपटक दिनरात गरी करिब २५ समूह बनाएर मतगणना गरिएको कटुवालले बताए।
उनका अनुसार निर्वाचनमा करिब एक लाख ६२ हजार मतपत्र गणना गरिएको थियो। कुल २२९ पदका लागि निर्वाचन भएको र मतदानका लागि २३ प्रकारका मतपत्र प्रयोग गर्नुपर्ने व्यवस्था रहेको उनले जानकारी दिए। निर्वाचन तथा मतगणनाका क्रममा कुनै ठूलो विवाद नभएको र प्रक्रिया सौहार्दपूर्ण रूपमा सम्पन्न भएको पनि उनले बताए।
मतगणना सम्पन्न भएसँगै अब नवनिर्वाचित पदाधिकारी तथा केन्द्रीय सदस्यलाई प्रमाणपत्र वितरण र शपथ ग्रहण गराउने तयारी गरिएको छ। निर्वाचन समितिका सदस्यसचिव कटुवालका अनुसार दसैंलगत्तै शपथ ग्रहण कार्यक्रम आयोजना गरिनेछ।
शपथ ग्रहणपछि कांग्रेसको नयाँ कार्यसमितिको पहिलो बैठक बस्ने नेताहरूले बताएका छन्। उक्त बैठकमा पार्टीको आगामी कार्ययोजना तथा स्थानीय तह निर्वाचनको तयारीसम्बन्धी विषयमा छलफल हुने अपेक्षा गरिएको छ।
Discussion about this post