कञ्चनपुर । कञ्चनपुरको भीमदत्त नगरपालिकाले वडा स्तरीय सामुदायिक विपद व्यवस्थापन समितिको लागी तालिम सम्पन्न गरेको छ । तालिममा भीमदत्त नगरपालिका ११, १२ र १३ नम्बर वडाका सामुदायिक विपद व्यवस्थापन समितिका सदस्यहरू, खोज उद्धार कार्यदलका सदस्यहरू, प्राथमिक उपचारका सदस्यहरू, वडा अध्यक्षहरूको सहभागिता रहेको थियो ।
तालिममा विपद जोखिम न्यूनिकरणका लागी तथा पूर्व तयारीका लागी अभिभुखिकरण गरिएको भीमदत्त नगरपालिकाका वन वातावरण फोहर मैला तथा विपद व्यवस्थापन शाखा प्रमुख मनोज प्रसाद भट्टले जानकारी दिएका छन् । साथै वडाहरूमा अभिभुखिकरण पछि लाइफ ज्याकेट, मोटर बोट लगायतका विपद व्यवस्थापन पूर्वका सामग्रीहरू समेत वितरणको तयारी रहेको भट्टको भनाइ रहेको छ।
कार्यक्रमका सभाध्यक्ष एवम् वडा नम्बर ११ का अध्यक्ष वन वातावरण फोहर मैला तथा विपद व्यवस्थापनका संयोजक प्रकाश थापाले वडाहरूमा टोल विपद व्यवस्थापन समिति गठन गरिएको बताए । साथै उनले विपद आएको बेलामा सम्बन्धित व्यक्तिहरूलाई जानकारी दिने सङ्गठित पार्ने तथा विपदको बेला कसरी उद्धार गर्न सकिन्छ भनेर समितिलाई तालिम प्रदान गरिएको बताएका छन् ।
कार्यक्रमका प्रमुख अतिथि भीमदत्त नगरपालिका नगर उपप्रमुख निलम लेखकले विपद जुनसुकै बेला पनि पर्न सक्ने भएकाले सबैले सतर्क र सचेत हुन जरुरी रहेको बताइन्। साथै उप प्रमुख लेखकले विपद हुने क्षेत्रमा महिलाहरू बढी प्रभावित हुने भएकाले तालिमपछि उनीहरू समेत सचेत र सतर्क हुने विश्वास व्यक्त गरिन्।
Discussion about this post