बैतडी –बैतडीको शिवनाथ गाउँपालिकाले पहिलो चौमासिकमा लक्ष्यभन्दा बढी राजस्व संकलन गरेको छ । चालु आर्थिक बर्षको पहिलो चौमासिकमा १० लाख राजस्व संकलन गर्ने लक्ष्य लिएकोमा १३ लाख १९ हजार १८१ रुपैयाँ राजस्व संकलन भएको हो ।
गाउँपालिकाले सबैभन्दा बढी सिफारिश दस्तुर शीर्षकमा राजस्व संकलन गरेको गाउँपालिकाका प्रमुख प्रशासकीय अधिकृत नरेन्द्र महताले बताए । उक्त शीर्षकमा ४ लाख ९५ हजार २५० रुपैयाँ राजस्व संकलन भएको छ ।
यस्तै अन्य क्षेत्रको आय शीर्षकमा ३ लाख ८१ हजार ३ सय रुपैयाँ राजस्व संकलन भएको छ भने सरकारी सम्पत्तीको बहालबाट प्राप्त आय शीर्षकमा १ लाख ६२ हजार २ सय रुपैयाँ संकलन भएको गाउँपालिकाले जनाएको छ ।
यस्तै व्यवसाय दर्ता दस्तुर शीर्षकमा ८१ हजार ७२५ रुपैयाँ, प्रशासनिक सेवा शुल्क शीर्षकमा ४१ हजार रुपैयाँ, व्यक्तिगत घटना दर्ता दस्तुर शीर्षकमा २७ हजार ८ सय रुपैयाँ, अन्य दस्तुर शीर्षकमा १८ हजार ६७५ रुपैयाँ, अन्य कर शीर्षकमा १४ हजार ७ सय रुपैयाँ, नाता प्रमाणित दस्तुर शीर्षकमा १२ हजार ४५० रुपैयाँ, अन्य राजस्व शीर्षकमा ९ हजार ४४० रुपैयाँ, व्यवसाय कर शीर्षकमा ६ हजार ५ सय रुपैयाँ, मालपोत शीर्षकमा २ हजार २२१ रुपैयाँ, परीक्षा शुल्क शीर्षकमा २ हजार रुपैयाँ र न्यायिक दस्तुर शीर्षकमा १ हजार २ सय रुपैयाँ राजस्व संकलन भएको गाउँपालिकाले जनाएको छ ।
यस्तै पहिलो चौमासिकमा ६२ हजार ७२० रुपैयाँ बेरुजु असुल भएको गाउँपालिकाका प्रमुख प्रशासकीय अधिकृत महताले बताए ।
गाउँपालिकाले चालु आर्थिक बर्षमा आन्तरिकतर्फ ३० लाख राजस्व संकलन गर्ने लक्ष्य लिएको छ । लक्ष्य अनुसारको आन्तरिक आम्दानी गर्नका लागि पालिका सफल हुने गाउँपालिकाका अध्यक्ष कर्णसिंह साउँदले बताए । सगुन खबर
Discussion about this post