पछिल्लो समयमा बैतडीमा सामुदायिक विद्यालयहरुको शैक्षिक गुणस्तर खस्कदै गएको छ । केही दिन अघिमात्रै प्रकाशित भएको माध्यमिक शिक्षा परीक्षा (एसईई)को परीक्षाफलमा बैतडीमा ए प्लस ग्रेड ल्याउने परीक्षार्थीको संख्या शून्य रहेको छ ।
परीक्षामा सहभागी भएकामध्ये कसैले पनि ए प्लस ग्रेड ल्याउन नसकेको शिक्षा विकास तथा समन्वय इकाइका प्राविधिक सहायक रामचन्द्र भट्टले बताए ।
कुनै बेला शिक्षा क्षेत्रमा अब्बल मानिएको बैतडीमा पछिल्लो समयमा लगातार शैक्षिक गुणस्तर खस्कदै गएको छ । गत बर्ष पनि जिल्लामा एसईई परीक्षामा कसैले पनि ए प्लस ग्रेड ल्याउन सकेका थिएनन् ।
सुदूरपश्चिमका ९ ओटा जिल्लामा मध्ये ए प्लस ग्रेड ल्याउन नसक्ने जिल्ला बैतडी मात्रै रहेको शिक्षा विकास निर्देशनालय दिपायलले जनाएको छ । जिल्लाबाट ५ हजार ३३८ जना परीक्षामा सहभागि भएका थिए । ती मध्ये कसैले पनि ए प्लस ग्रेड ल्याउन नसकेको प्राविधिक सहायक भट्टले बताए ।
माध्यमिक तह सम्मको शिक्षा हेर्ने अधिकार अहिले स्थानीय तहलाई छ । निरन्तर रुपमा शैक्षिक गुणस्तर ओरोलो लाग्दै गएको भएपनि स्थानीय तहहरुले शैक्षिक गुणस्तर सुधारका लागि कुनै पहल गर्न सकेका छैनन् ।
बैतडीबाट ३४ जनाले ए ग्रेड ल्याएका छन् भने बी प्लस ग्रेड ल्याउने परीक्षार्थीको संख्या १७२ रहेको छ । यस्तै ६४७ जनाले बी ग्रेड ल्याउँदा १ हजार ५०६ जनाले सी प्लस ग्रेड ल्याएका छन् । यस्तै १ हजार ७९८ जनाले सी ग्रेड ल्याउँदा ९८४ जनाले डी प्लस ग्रेड ल्याएका छन् । जिल्लामा ८२ जनाले डी ग्रेड ल्याएका छन् । एसईईमा ११५जना अनुपस्थित रहेका थिए ।
बैतडी बाहेकका जिल्लाबाट परीक्षार्थीहरुले ए प्लस ग्रेड ल्याएका छन् । प्रदेशमा सबैभन्दा बढी कैलालीबाट २२७ जनाले ए प्लस ग्रेड ल्याएका छन् । यस्तै डोटीबाट ७४ जनाले,कञ्चनपुरबाट ७२ जनाले, डडेल्धुराबाट २२ जनाले,दार्चुलाबाट १२ जनाले, अछामबाट ९ जनाले, बाजुराबाट ५ जना र बझाङबाट एक जनाले ए प्लस ग्रेड ल्याएका छन् ।
बैतडीमा १२९ सामुदायिक र ४ ओटा संस्थागत गरेर १३३ विद्यालयबाट परीक्षार्थीहरु एसईईमा सहभागी भएका थिए ।
सामुदायिक विद्यालयहरुमा राजनीति प्रभाव बढ्दै गएपछि शैक्षिक गुणस्तर खस्कदै गएको शिक्षा क्षेत्रका जानकारहरुले बताएका छन् । शिक्षक भर्नादेखि विद्यालय व्यवस्थापन समिति चयन सम्म राजनीतिक खिचातानी हुने र यसले शैक्षिक गुणस्तरमा नकारात्मक प्रभाव पर्दै गएको जगन्नाथ बहुमुखी क्याम्पसका प्रमुख पृथ्वीराज अवस्थीले बताए । उनले भने ‘शिक्षा क्षेत्रमा राजनीति हाबी हुँदा शैक्षिक गुणस्तर खस्कदै गएको छ । यसका लागि स्थानीय सरकारहरुले ध्यान दिनुपर्ने हुन्छ ।’
शिक्षकहरुको तलबमा लाखौं रुपैंया खर्च गरिरहेका स्थानीय तहहरु शिक्षा क्षेत्रको अनुगमन, निरीक्षणमा भने चुकेका छन् । सामुदायिक विद्यालयहरुको शैक्षिक नतिजा लगातार आरोलो लाग्दा समेत तहहरुले यो बिषयमा ध्यान दिन सकेका छैनन् ।
प्रत्येक बर्ष एसईईको नतिजा खस्कदै गएकाले शैक्षिक गुणस्तर सुधारका लागि जिल्लाका १० ओटै स्थानीय तहहरुले सामूहिक रुपमा रणनीति बनाउनुपर्नेमा अवस्थीले जोड दिए । उनले भने ‘अहिले माध्यमिक तह सम्मको शिक्षा हेर्ने अधिकार स्थानीय सरकारलाई छ । विद्यालयहरुको शैक्षिक गुणस्तर सुधारमा स्थानीय सरकारहरुको ध्यान जानु आवश्यक छ ।’
स्थानीय सरकारहरुले विद्यालयहरुको शैक्षिक गुणस्तर सुधारमा ध्यान नदिँदा सम्म समस्या समाधान नहुने शिक्षा विकास तथा समन्वय इकाइ बैतडीका प्रमुख नरेन्द्रप्रसाद अवस्थीले बताए । सगुन खबर बाट साभार
Discussion about this post