सुदूरपश्चिमको बाजुरा, बझाङ, डडेल्धुरा, बैतडी, दार्चुला र डोटीलगायत जिल्लाका उच्च क्षेत्रमा बुधबार रातिदेखि हिमपात सुरु भएको छ । हिउँ परेसँगै लेकाली क्षेत्रमा अत्याधिक चिसो बढेको छ । हिमपातले एक्कासी बढेको चिसोले विशेषगरी वृद्धवृद्धा, बालबालिका तथा गरिखाने वर्ग बढी प्रभावित भएका छन् ।
विशेषगरी दार्चुलाका विभिन्न क्षेत्रमा रातिदेखि नै हिमपात सुरु भएपछि जनजीवन कस्टकर बनेको छ । दार्चुलाका उच्च हिमाली क्षेत्र ब्यास, नौगाड, अपी हिमाल, न्वालपानी, दल्लेखलगायतका क्षेत्रमा हिमपात भएको मालिकार्जुन गाउँपालिका–२ का स्थानीय धनसिंह धामीले बताए ।
त्यस्तै, ब्यास गाउँपालिका–३ को सीना तुसरपानी, वडा–२ को राप्ला, दुम्लिङ, वडा–४ को सुन्सेरा, डोकट, वडा–५ को धौलाकोट, वडा–६ को हुतीलगायतका बस्तीहरूमा हिउँ परेको ब्यास गाउँपालिकाका स्थानीय पदमराज भट्टले बताए । उनका अनुसार कालापानी नजिकको क्षेत्र वडा–१ छाङरु र तिंकरमा भारी हिमपात भएको छ । हिउँले खानेपानीका पाइपहरू जाम भएका छन् भने शौचालय जानसमेत समस्या भएको छ ।
हिउँदमा भारी हिमपात हुने छाङरु र तिंकरका स्थानीय बासिन्दा मंसिर महिनामै दार्चुला सदरमुकाम खलंगा झरिसकेका छन् । तिंकर गाउँ हिउँदमा मानवविहीन हुने गरेको छ भने १२ किलोमिटर तल रहेको छाङरु गाउँमा नेपाल प्रहरी र सशस्त्र प्रहरी बाह्रै महिना बस्ने गरेको छ । अहिले चिसोका कारण ब्यास गाउँपालिका–१ छाङ्रुमा रहेका सुरक्षाकर्मीलाई पनि समस्या भएको जिल्ला प्रहरी कार्यालय दार्चुलाका प्रमुख मनोहर भट्टले बताए । सुन्दरसिंह धामीले अन्नपूर्ण पोस्टमा लेखेका छन्।
