काठमाडौं । प्रधानमन्त्री बालेन शाह र नेपाल भ्रमणमा रहेका भारतीय विदेश सचिव विक्रम मिस्रीबीच शिष्टाचार भेटवार्ता भएको छ।
बुधबार बिहान सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको भेटमा प्रधानमन्त्री बालेनको आगामी भारत भ्रमण र भ्रमणका क्रममा उठाइने विषयबारे छलफल भएको बताइएको छ।
भारत भ्रमणको तयारीका लागि विदेश सचिव मिस्री बुधबार काठमाडौं आइपुगेका हुन्। भेटका क्रममा उनले भोटेकोशी बाढीबाट भएको मानवीय तथा भौतिक क्षतिप्रति दुःख व्यक्त गर्दै विस्थापित नागरिकको पुनर्स्थापना र पुनर्निर्माणमा भारत सहयोग गर्न तयार रहेको बताएका थिए।
जवाफमा प्रधानमन्त्री बालेनले भारतले नेपाललाई गर्दै आएको सहयोगप्रति प्रशंसा व्यक्त गरेको स्रोतले जनाएको छ।
सिंहदरबार स्रोतका अनुसार भेटमा नेपाल–भारत द्विपक्षीय सम्बन्ध, आपसी हित, सहयोग आदानप्रदान तथा आगामी दिनमा सहकार्यका सम्भावनाबारे पनि छलफल भएको छ। यद्यपि, भेटवार्ताबारे दुवै पक्षबाट औपचारिक विवरण सार्वजनिक गरिएको छैन।
प्रधानमन्त्रीको भारत भ्रमणलाई लक्षित गर्दै नेपालका परराष्ट्र मन्त्रालय र भारतको विदेश मन्त्रालयले आवश्यक तयारी गरिरहेका छन्। भ्रमणको औपचारिक मिति र विस्तृत कार्यसूची भने सार्वजनिक भइसकेको छैन।
प्रधानमन्त्रीको भ्रमणका क्रममा नेपालले आर्थिक सहयोग, विकास आयोजना र नयाँ सहकार्यका क्षेत्रलाई प्राथमिकतामा राख्ने तयारी गरेको छ। विशेषगरी ऊर्जा व्यापार, अन्तरदेशीय विद्युत् प्रसारण लाइन, सडक तथा रेल सञ्जाल, हवाई सम्पर्क, व्यापार र पारवहन सहजीकरणका विषय छलफलका सम्भावित प्रमुख एजेन्डा रहेका छन्।
भारतीय विदेश सचिव मिस्रीको भ्रमणलाई प्रधानमन्त्रीको भारत भ्रमणको मिति, कार्यसूची र नेपालले उठाउने प्राथमिकताका विषय टुंग्याउने महत्त्वपूर्ण अवसरका रूपमा हेरिएको छ।
Discussion about this post