कञ्चनपुर । भीमदत्त नगरपालिका वडा नम्बर -११ मा स्वर्गीय दीपक कुमार थापा (डी.के.) स्मृति वडा स्तरीय डे-नाइट पुरुष भलिबल प्रतियोगिता शुरू भएको छ। जनचेतना क्लबको आयोजना र भीमदत्त -११ को समन्वयमा आयोजित यो प्रतियोगिताको बिहीबार सुदूरपश्चिम प्रदेश सभा सदस्य बेल बहादुर रानाले उद्घाटन गर्नुभएको छ।
कार्यक्रमको सभापतित्व जनचेतना क्लबका अध्यक्ष हरेन्द्र रानाले गर्नुभएको थियो । आयोजकका अनुसार प्रतियोगितामा कुल ८ टिमले सहभागिता जनाएका छन्। प्रतियोगिताको विजेतालाई रु. ५५ हजार प्रदान गरिनेछ भने दोस्रो हुने टिमलाई रु. २५ हजार र तेस्रो हुने टिमलाई रु. १५ हजार पुरस्कार प्रदान गरिनेछ।
कार्यक्रममा भीमदत्त -११ का वडा अध्यक्ष प्रकाश थापा, नेपाल उद्योग वाणिज्य संघका केन्द्रीय सदस्य जंग बहादुर मल्ल, शसस्त्र प्रहरी गड्डाचौकी नाकाका डिएसपी बिरेन्द्र पाल, गड्डाचौकी ट्राफिक इन्चार्ज भानदेव जोशी र स्वर्गीय दीपक थापाकी पूज्यनीय आमा द्रोपती थापा विशिष्ट अतिथिको रूपमा उपस्थित रहनुभएका थिए।
प्रमुख अतिथि रानाले कार्यक्रममा बोल्दै खेलकुदले युवाहरूलाई अनुशासित र स्वस्थ जीवनशैली अपनाउन प्रेरित गर्ने बताउनुभयो। उहाँले यस्ता प्रतियोगिताले सामुदायिक एकता र स्थानीय प्रतिभा प्रस्फुरणमा योगदान पुर्याउने उल्लेख गर्नुभयो।
त्यस्तै, वडा अध्यक्ष प्रकाश थापाले स्वर्गीय दीपक थापाको स्मृतिमा आयोजित यो प्रतियोगिताले स्थानीय खेलाडीहरूलाई प्रोत्साहन प्रदान गर्ने र सामाजिक सद्भाव बढाउने विश्वास व्यक्त गर्नुभयो।
नेपाल उद्योग वाणिज्य संघका केन्द्रीय सदस्य जंग बहादुर मल्लले खेलकुद र सामुदायिक गतिविधिहरूले स्थानीय अर्थतन्त्र र सामाजिक विकासमा सकारात्मक प्रभाव पार्ने बताउनुभयो। उहाँले यस्ता कार्यक्रमलाई निरन्तरता दिन आयोजकलाई प्रोत्साहन समेत गर्नुभयो।
Discussion about this post