कञ्चनपुर – कञ्चनपुरको वेदकोट नगरपालिका ९ मा रहेको उदयदेव माध्यमिक विद्यालयको ३६ औँ वार्षिकोत्सव तथा अभिभावक दिवस सम्पन्न भएको छ। शनिबार सम्पन्न उक्त कार्यक्रममा वेदकोट नगरपालिका वडा नम्बर ९ का वडा अध्यक्ष जनक बहादुर बिष्टको प्रमुख आतिथ्य रहेको थियो भने विद्यालय व्यवस्थापन समितका अध्यक्ष भरत बहादुर रोकायाको सभापतित्व रहेको थियो।
कार्यक्रममा बोल्दै प्रमुख अतिथि एवम् वडा अध्यक्ष बिष्टले वडामा रहेको उक्त विद्यालयले शिक्षाको क्षेत्रमा पुर्याएको योगदानको कदर गर्दै विद्यालयलाई वडाबाट हुने हरेक सम्भव सहयोग गर्ने प्रतिवद्धता गरेका छन्। साथै उनले वडा कार्यालय शिक्षाको क्षेत्रमा संवेदनशिल रहेको बताएका छन्।
त्यसैगरी विद्यालय व्यवस्थापन समितका अध्यक्ष भरत बहादुर रोकायाले विगतको दिनभन्दा विद्यालयको शैक्षिक गुणस्तरमा सुधार भइरहेको बताए। उनले भने ‘विगतका दिनभन्दा हाम्रो यस विद्यालयमा शैक्षिक गुणस्तर बढेको छ र हामी निरन्तर विद्यालयको स्तरोन्नति हुने कार्यतिर निरन्तर खटिएका छौँ।’
विद्यालयका शिक्षक लवेदव अवस्थीले सञ्चालन गरेको उक्त कार्यक्रममा विद्यालयका प्रधानाध्यापक महेश्वर दत्त भट्टले वार्षिक प्रगति प्रतिवेदन प्रस्तुत गरेका थिए। त्यसैगरी कार्यक्रममा विद्यालयमा अध्ययनरत गरिब तथा जेहनदार विद्यार्थीहरूलाई छात्रवृत्ति प्रदान गरिएको छ भने विद्यालयले सञ्चालन गरेका अतिरिक्त क्रियाकलाप र परीक्षामा उत्कृष्ट नतिजा ल्याउन सफल विद्यार्थीहरूलाई पुरस्कार प्रदान गरिएको छ।
विद्यालयले वार्षिकोत्सवमा विद्यालय स्थापना र सञ्चालनमा सहयोग गर्ने विभिन्न संस्था र व्यक्तिहरूलाई पनि सम्मान पत्र सहित सम्मान गरेको छ भने विद्यालयमा लामो समयदेखि कार्यरत शिक्षकलाई समेत सम्मान गरिएको छ।
कार्यक्रममा विभिन्न राजनीतिक दलका प्रतिनिधि, समाजसेवी, सुरक्षाकर्मी, पत्रकार, विद्यार्थी, अभिभावक लगायतको भव्य उपस्थिति रहेको थियो भने विभिन्न सांस्कृतिक कार्यक्रमहरू समेत आयोजना गरिएका थिए। साथै कार्यक्रममा सहिदहरूको तस्वीरमा माल्यार्पण समेत गरिएको थियो।
Discussion about this post