बैतडी । बैतडीको पाटन नगरपालिका वडा नम्बर ३ मा रहेको श्री शिगास माध्यमिक विद्यालयले ५८ औं वार्षिकोत्सव एवम् अभिभावक समारोह सम्पन्न गरेको छ। विद्यालयले शुक्रबार विभिन्न सांस्कृतिक कार्यक्रम सहित ५८ औं वार्षिकोत्सव भव्य रुपमा मनाएको विद्यालयका शिक्षक दिलिप सिंह कठायतले जानकारी दिएका छन्। वार्षिकोत्सवको पुनीत अवसरमा मंसिर १३ गतेका दिन सातवटा विद्यालयहरूको सहभागितामा अन्तर विद्यालय आधारभुत तह (६–८) स्तरीय हाजिरजवाफ कार्यक्रम समेत सञ्चालन गरिएको थियो।
विद्यालयका संस्थापक शिक्षक भाष्कर सिंह केसीको सभाध्यक्षतामा सम्पन्न उक्त कार्यक्रममा जिल्ला समन्वय समिति बैतडीका प्रमुख खगेन्द्र सिंह धामी प्रमुख अतिथि रहेका थिए भने भने पाटन नगरपालिका वडा नं. ३, ८, ९ र १० का वडा अध्यक्षहरू विशिष्ट अतिथि रहन भएको विद्यालयले जनाएको छ । स्थानीय जनप्रतिनिधि, पाटन नगरपालिका शिक्षा शाखा प्रतिनिधि, पूर्व नगर उपप्रमुख, विभिन्न विद्यालयका विद्यालय व्यवस्थापन समितिका अध्यक्ष, प्रधानाध्यापक, शिक्षक, सामुदायिक वनका प्रतिनिधि, पूर्व विद्यार्थी, अभिभावक, शिक्षक विद्यार्थीहरूको सहभागिता सहित ठूलो जनसहभागिता रहेको थियो ।
अन्तर विद्यालय आधारभुत तह स्तरीय हाजिरजवाफ कार्यक्रममा प्रथम स्थान शिगास माध्यमिक विद्यालय गौरिशङ्कर पोखरी पाटन ३, द्वितीय स्थान आधारभुत विद्यालय पन्त्यौडा पाटन ६, तृतिय सिद्धेश्वर माध्यमिक विद्यालय पाटन ९, हुक्केडाँडा र सान्त्वना जनता माध्यमिक विद्यालय पाटन ८, आरुबाट विद्यालयका सहभागि भाइबहिनीहरूको समूहले स्थान प्राप्त गरेको विद्यालय व्यवस्थापन समितिका अध्यक्ष प्रेम सिंह भाटले बताउन भएको छ । यसै अवसरमा विद्यालयका निवर्तमान वि.व्य.स. अध्यक्ष डम्बरदत्त पन्त, पूर्व वि.व्य.स. अध्यक्ष दान बहादुर विष्ट, पूर्व शिक्षक अभिभावक संघका अध्यक्ष नवराज भट्ट र संस्थापक शिक्षक एवं पूर्व वि.व्य.स. अध्यक्ष भाष्कर सिंह के.सी लाई दोसल्ला माला टीका र सम्मान पत्रबाट सम्मानित गरिएको छ ।
वार्षिकोत्सवमा सदनात्मक एवं एकल रुपमा विद्यार्थीहरूका विभिन्न प्रतिभाहरू प्रस्तुत गरिएको जनाएको छ । विद्यालयका प्रधानाध्यापक मान बहादुर चन्दले विगत एक वर्षको वार्षिक प्रगति प्रतिवेदन सभामा पेश गरेका थिए । कक्षा १२ सम्म पढाई भइरहेको यस विद्यालयमा हाल पाँच सय भन्दा बढी विद्यार्थीहरू अध्ययन रहेका छन् । भौगोलिक रुपमा जिल्लाकै उत्कृष्ट केन्द्र बिन्दुको रुपमा रहेको यस विद्यालयमा पाटन नगरपालिका वडा नं. २, ३, ६, ८, ९ र सुर्नया गाउँपालिकाको वडा नं. ५ का बालबालिकाहरू यस विद्यालयमा प्रत्यक्ष अध्ययनको लागि आँउछन् भने उच्च शिक्षा अध्ययनका लागि अन्य क्षेत्रबाट आउने गरेको शिक्षक कठायतले बताउन भएको छ । कार्यक्रममा बोल्दै प्रमुख अतिथिले विद्यालयको अनुशासन राम्रो रहेको र विद्यालयको सर्वाङ्गीण विकासका लागि आफ्नो तर्फबाट सक्दो पहल गर्ने बताएका छन् ।
Discussion about this post