काठमाडौं – सर्वोच्च अदालतका लागि प्रस्तावित चार जना न्यायाधीशविरुद्ध १३ वटा उजुरी परेका छन्।
संसदीय सुनुवाइ समितिले प्रस्तावित न्यायाधीशहरूको सुनुवाइ प्रक्रिया अघि बढाएको हो। समितिको बैठकमा रत्नबहादुर बागचन्द, चन्द्रबहादुर सारू, जनक पाण्डे र गोकर्ण डाँगीविरुद्ध परेका उजुरी खोलिएको थियो।
प्राप्त उजुरीहरू अध्ययनका लागि समिति सदस्यहरूलाई वितरण गरिएको छ। समितिले उजुरीकर्तासँग आज छलफल गर्ने कार्यतालिका बनाएको छ।
न्याय परिषद्ले सर्वोच्च अदालतको रिक्त न्यायाधीश पदमा नियुक्तिका लागि चारै जनाको नाम सिफारिस गरेको थियो।
संवैधानिक व्यवस्थाअनुसार संसदीय सुनुवाइ समितिबाट नाम अनुमोदन भएपछि राष्ट्रपतिले न्यायाधीश नियुक्त गर्ने व्यवस्था छ।
Discussion about this post