काठमाण्डौ – नेपाल प्रिमियर लिग (एनपीएल) क्रिकेटमा काठमाण्डौ गोर्खाजले लगातार दोस्रो जित निकालेको छ । काठमाण्डौले विराटनगर किङ्ग्सलाई ९ विकेटले पराजित गर्दै प्रतियोगितामा तेस्रो खेलबाट दोस्रो जित हात पारेको हो ।
त्रिवि अन्तर्राष्ट्रिय क्रिकेट मैदानमा हिजो बेलुकी भएको खेलमा विराटनगरले दिएको ८४ रनको सामान्य लक्ष्य काठमाण्डौले ९ ओभर ४ बलमा १ विकेट गुमाएर पूरा गर्यो ।
काठमाण्डौको जितमा डेभिड वार्नर र विलियम बोसिस्टोले उत्कृष्ट ब्याटिङ गरे । दोस्रो विकेटका लागि यी दुई खेलाडीले ६९ रनको अविजित साझेदारी गरे । वार्नरले २४ बलमा २ चौका र ३ छक्काको मद्दतमा अविजित ४४ रन बनाए भने बोसिस्टोले २४ बलमा ३ चौकासहित २३ रन जोडे ।
त्यसअघि टस जितेर पहिले ब्याटिङ गरेको विराटनगर १८ ओभर ३ बलमा ८३ रन बनाउँदै अलआउट भएको थियो । यो जारी प्रतियोगिताकै सबैभन्दा कम योगफल हो । यसअघि पहिलो खेलमा सुदूरपश्चिम रोयल्स लुम्बिनी लायन्ससँग ८७ रनमा अलआउट भएको थियो ।
विराटनगरका लागि एन्जेलो म्याथ्युज र रुपेश सिंहले ३९ रनको साझेदारी गरे । बसिर अहमदले १० रन बनाए । अन्य ब्याटरले उल्लेख्य प्रदर्शन गर्न सकेनन् ।
काठमाण्डौका लागि सन्तोष यादवले सर्वाधिक ३ विकेट लिए । करण केसी र सहानले २–२ विकेट लिँदा जहानदाद खान, साहब आलम र देव शाहले १–१ विकेट हात पारे ।
जितसँगै ४ अंक जोडेको काठमाण्डौ राम्रो रनरेटका आधारमा अंकतालिकाको दोस्रो स्थानमा उक्लिएको छ । लुम्बिनी लायन्स ७ अंकसहित शीर्ष स्थानमा कायम छ । काठमाण्डौसँगै विराटनगर, कर्णाली, जनकपुर र सुदूरपश्चिमको समान ४ अंक रहेको छ । तीनवटै खेलमा पराजित पोखरा अंकविहीन हुँदै तालिकाको पुछारमा छ भने चितवनको ३ अंक छ ।
यसैगरी हिजो दिउँसो भएको खेलमा लुम्बिनी लायन्सले जनकपुर बोल्ट्सलाई १६ रनले पराजित गरेको थियो । लुम्बिनीले दिएको १५० रनको लक्ष्य पछ्याएको जनकपुरले निर्धारित २० ओभरमा ८ विकेट गुमाएर १३३ रन मात्रै बनाउन सक्यो । जितसँगै लुम्बिनीले अंकतालिकाको शीर्ष स्थानमा आफ्नो पकड बलियो बनाएको छ ।
एनपीएलमा आज पनि दुई खेल हुँदैछन् । पहिलो खेल दिउँसो साढे १२ बजे सुदूरपश्चिम रोयल्स र कर्णाली याक्सबीच हुनेछ भने दोस्रो खेल बेलुकी ५ बजे चितवन राइनोज र पोखरा एभेन्जर्सबीच प्रतिस्पर्धा हुनेछ ।
आठ टोली सहभागी प्रतियोगिताको तेस्रो संस्करण आगामी मङ्सिर ५ गतेसम्म सञ्चालन हुनेछ ।
Discussion about this post