रवि लामिछाने पत्नी निकितासहित तीनदिने धार्मिक भ्रमणमा भारत प्रस्थान

राष्ट्रिय स्वतन्त्र पार्टी (रास्वपा) का सभापति रवि लामिछाने पत्नी निकिता पौडेलसहित तीनदिने निजी तथा धार्मिक भ्रमणका लागि भारत प्रस्थान गरेका छन्।

लामिछाने आज बिहान काठमाडौंबाट हवाईजहाजमार्फत धनगढी पुगेका हुन्। धनगढी हुँदै उनी भारत जाने कार्यक्रम रहेको जनाइएको छ।

लामिछानेको सचिवालयका अनुसार भ्रमणका क्रममा उनले भारतको उत्तराखण्डस्थित नैनीतालमा रहेको कैँचीधाम र आसामको गुवाहाटीस्थित कामाख्या मन्दिरमा परिवारसहित पूजाआजा गर्ने कार्यक्रम छ।

तीनदिने धार्मिक तथा पारिवारिक भ्रमण पूरा गरेपछि लामिछाने स्वदेश फर्किनेछन्। उनको सचिवालयले यस भ्रमणलाई निजी तथा पारिवारिक तीर्थाटनका रूपमा व्याख्या गरेको छ।