काठमाडौँ । बाढीपहिरो र कालीगण्डकी नदीको कटानका कारण क्षतिग्रस्त कालीगण्डकी करिडोर २२० केभी प्रसारण लाइनअन्तर्गत म्याग्दीको दाना–राहुघाट खण्ड २१ दिनपछि पुनः सञ्चालनमा आएको छ। नेपाल विद्युत् प्राधिकरणले आपत्कालीन पुनःस्थापना प्रणाली (इआरएस) टावर प्रयोग गरी प्रसारण लाइनलाई अस्थायी रूपमा सञ्चालनमा ल्याएको हो।
प्राधिकरणका अनुसार गएराति प्रसारण लाइनको २२० केभीको एउटा सर्किट चार्ज गरी सञ्चालनमा ल्याइएको हो। गत असोज ११ गते आएको बाढीपहिरोका कारण म्याग्दीको अन्नपूर्ण गाउँपालिका–६, पोखरेबगरमा रहेका प्रसारण लाइनका चार वटा टावरमा क्षति पुगेको थियो। तीमध्ये टावर नम्बर २१, २३ र २४ पूर्ण रूपमा क्षतिग्रस्त भएका थिए भने टावर नम्बर २२ मा आंशिक क्षति पुगेको थियो।
प्रसारण लाइन अवरुद्ध हुँदा दाना सबस्टेसनमार्फत राष्ट्रिय प्रसारण प्रणालीमा जोडिएका निजी क्षेत्रका पाँच जलविद्युत् आयोजनाबाट उत्पादित कुल १७० मेगावाट विद्युत् प्रणालीमा प्रवाह हुन सकेको थिएन। प्रसारण लाइन पुनः सञ्चालनमा आएसँगै ती आयोजनाबाट उत्पादित विद्युत् राष्ट्रिय प्रसारण प्रणालीमा जोडिएको छ।
नेपाल विद्युत् प्राधिकरणका कार्यकारी निर्देशक दीर्घायुकुमार श्रेष्ठले इआरएस टावर प्रयोग गरी प्रसारण लाइनलाई अस्थायी रूपमा सञ्चालनमा ल्याउन सफलता मिलेको बताउनुभयो। भौगोलिक रूपमा अत्यन्त जटिल र दुर्गम क्षेत्रमा इआरएस टावर जडान गर्नु चुनौतीपूर्ण भए पनि निरन्तरको प्रयासबाट काम सम्पन्न गर्न सकिएको उहाँको भनाइ छ।
प्राधिकरणको पोखरा ग्रिड महाशाखाका प्रमुख रोशन खड्काका अनुसार अस्थायी रूपमा प्रसारण लाइन सञ्चालनमा ल्याइएसँगै बाढीले क्षति पुर्याएका टावरको स्थायी पुनर्निर्माण प्रक्रिया अघि बढाइएको छ। स्थायी टावर निर्माण सम्पन्न भएपछि दाना–राहुघाट खण्ड नियमित अवस्थामा सञ्चालन हुनेछ।
कालीगण्डकी र यसका सहायक नदीमा निर्माण हुने जलविद्युत् आयोजनाबाट उत्पादित विद्युत् एकीकृत गरी राष्ट्रिय प्रसारण प्रणालीमा प्रवाह गर्ने उद्देश्यले कालीगण्डकी करिडोर २२० केभी डबल सर्किट प्रसारण लाइन निर्माण गरिएको हो।
म्याग्दीको अन्नपूर्ण गाउँपालिका–३ स्थित दाना सबस्टेसनबाट सुरु भई पर्वत, बागलुङ, स्याङ्जा, पाल्पा र रुपन्देही हुँदै नवलपरासी (बर्दघाट सुस्ता पश्चिम) को सुनवल नगरपालिका–१३ स्थित नयाँ बुटवल सबस्टेसनसम्म पुग्ने यस प्रसारण लाइनको कुल लम्बाइ करिब १३० किलोमिटर छ। यसले करिब १ हजार २०० मेगावाट विद्युत् प्रवाह गर्न सक्ने क्षमता राख्छ।
Discussion about this post