काठमाडौं । बडादसैँको आठौँ दिन आज महाअष्टमी पर्व देशभर श्रद्धा र भक्तिभावका साथ मनाइँदैछ। यस अवसरमा दुर्गा भवानीका स्वरूप महाकाली, महालक्ष्मी र महासरस्वतीको विशेष पूजा आराधना गरिँदैछ।
वैदिक सनातन परम्पराअनुसार महाअष्टमीका दिन दसैँघर, कोत तथा विभिन्न शक्तिपीठहरूमा दुर्गा भवानीको विशेष पूजा गरिन्छ। आज राति कालरात्रिका रूपमा पनि विधिपूर्वक पूजा आराधना गर्ने परम्परा रहेको धर्मशास्त्रविद्हरू बताउँछन्।
महाअष्टमीका अवसरमा काठमाडौं उपत्यकाका गुह्येश्वरी, भद्रकाली, दक्षिणकालीलगायतका शक्तिपीठमा बिहानैदेखि भक्तजनको भीड लागेको छ। त्यस्तै, उपत्यकाबाहिर डडेलधुराको उग्रतारा, गोरखाको मनकामना, ताप्लेजुङको पाथीभरा र सप्तरीको छिन्नमस्ता भगवतीलगायतका शक्तिपीठमा पनि श्रद्धालुहरू पूजाआजा गर्न पुगेका छन्।
यस दिन कलपूर्जा, हातहतियार तथा सवारीसाधनको सरसफाइ गरी पूजा गर्ने परम्परासमेत रहेको छ।
Discussion about this post