काठमाडौं । प्रधानमन्त्री बालेन्द्र साहले राजनीतिक दबाब र व्यक्तिगत स्वार्थबाट प्रभावित नभई निष्पक्ष रूपमा कानूनको शासन कायम गर्न प्रहरी निरीक्षकहरूलाई निर्देशन दिएका छन्।
सोमबार राष्ट्रिय प्रहरी प्रशिक्षण प्रतिष्ठानमा आयोजित प्रहरी निरीक्षक आधारभूत तालिमको १८४औँ समूहको दीक्षान्त समारोहलाई सम्बोधन गर्दै प्रधानमन्त्री साहले इमानदारी, अनुशासन र नैतिकतालाई नेपाल प्रहरीको गरिमा कायम राख्ने प्रमुख आधारका रूपमा प्रस्तुत गरेका हुन्।
करिब १६ महिनाको कठोर तालिम पूरा गरी कार्यक्षेत्रमा प्रवेश गर्न लागेका प्रहरी अधिकृतहरूलाई बधाई दिँदै उनले पेशागत मर्यादा, जवाफदेहिता र निष्ठालाई आत्मसात् गरी जिम्मेवारी निर्वाह गर्न आग्रह गरे।
प्रधानमन्त्री साहले संविधान, प्रचलित कानून र नियमको पूर्ण पालना गर्दै कुनै पनि अनुचित दबाब वा प्रभावमा नपरी निष्पक्ष रूपमा काम गर्नुपर्नेमा जोड दिए।
‘यस तालिमबाट प्रहरी निरीक्षकको जिम्मेवारी निर्वाह गर्न आवश्यक ज्ञान, सीप र क्षमता हासिल गर्नुभएको छ भन्ने विश्वास लिएको छु। अब प्राप्त ज्ञान र सीपलाई व्यवहारमा उतार्दै नैतिकता, निष्ठा, इमानदारी, अनुशासन र जवाफदेहितालाई आफ्नो कार्यसम्पादनको आधार बनाउनुहुनेछ भन्ने अपेक्षा गर्दछु,’ उनले भने।
बदलिँदो समयसँगै अपराधको स्वरूप पनि परिवर्तन भइरहेकाले अनुसन्धान प्रक्रियालाई निष्पक्ष, वैज्ञानिक र प्रमाणमुखी बनाउन सूचना प्रविधिको प्रभावकारी प्रयोग आवश्यक रहेको प्रधानमन्त्री साहको भनाइ छ।
‘शान्ति सुरक्षा कायम गर्ने, अपराध अनुसन्धान गर्ने तथा संकटका बेला नागरिकको जिउधनको रक्षा गर्ने महत्त्वपूर्ण जिम्मेवारी नेपाल प्रहरीको हो। बदलिँदो अपराधको स्वरूपलाई ध्यानमा राख्दै अनुसन्धानलाई निष्पक्ष, वैज्ञानिक र प्रमाणमुखी बनाउन सूचना प्रविधिको उचित प्रयोग गर्नु आवश्यक छ,’ उनले भने।
प्रहरी सङ्गठनलाई आवश्यक स्रोतसाधन उपलब्ध गराउन सरकार प्रतिबद्ध रहेको उल्लेख गर्दै प्रधानमन्त्री साहले सङ्गठनको मर्यादा र प्रोटोकलविपरीत हुने व्यक्तिगत स्वार्थ तथा अनुचित प्रभावबाट टाढा रहन प्रहरी अधिकारीहरूलाई सचेत गराए।
नागरिकको जिउधनको सुरक्षा, अपराध नियन्त्रण र देशमा शान्ति सुव्यवस्था कायम गर्ने जिम्मेवारी निर्वाह गर्दा कुनै पनि सम्झौता नगरी निर्भीकताका साथ काम गर्नुपर्नेमा उनले जोड दिए।
दीक्षान्त समारोहमा प्रशिक्षार्थीका अभिभावक तथा प्रहरी नेतृत्वको उपस्थिति रहेको थियो। तालिम पूरा गरेका प्रहरी निरीक्षकहरू अब देशका विभिन्न भागमा खटिएर शान्ति सुरक्षा कायम गर्ने, अपराध अनुसन्धान गर्ने तथा नागरिकको सेवामा योगदान पुर्याउनेछन्।
Discussion about this post