लन्डन । लामो समयदेखि आन्तरिक विवादका कारण निष्क्रियजस्तै बनेको नेपाली जनसम्पर्क समिति बेलायतको अधिवेशन सम्पन्न भएको छ। अधिवेशनबाट हितकाजी गुरुङको नेतृत्वमा नयाँ कार्यसमिति सर्वसम्मत रूपमा चयन गरिएको जनाइएको छ।
नेपाली कांग्रेसका सभापति गगनकुमार थापाले अधिवेशन सम्पन्न गराउने जिम्मेवारी दिएपछि शेरबहादुर सुनारको संयोजकत्वमा प्रक्रिया अघि बढाइएको थियो। विभिन्न पक्षसँग छलफल र समन्वय गर्दै एक साताभित्र अधिवेशन सम्पन्न गरिएको हो।
अल्डरसटमा आयोजित अधिवेशनमा विधान संशोधन र राजनीतिक प्रतिवेदन पारित गरिएको थियो। समितिका नवीकरण गरिएका १ हजार ९५७ र नयाँ १६७ गरी कुल २ हजार १२४ सदस्य रहेका छन्।
बेलायतबाट नेपाली कांग्रेसको १५औँ महाधिवेशनका लागि १४ जना प्रतिनिधि चयन भएका छन्। प्रतिनिधिमार्फत पार्टीलाई लेबीबापत ५२ लाख ५७ हजार ८८५ रुपैयाँ पठाइएको जनाइएको छ।
अधिवेशन सम्पन्न गर्न सहयोग गर्ने सबै नेता तथा कार्यकर्तालाई शेरबहादुर सुनारले धन्यवाद दिएका छन्।
Discussion about this post