काठमाडौं । राष्ट्रपति रामचन्द्र पौडेलले आधुनिक प्रविधि र कृत्रिम बुद्धिमत्ताको बढ्दो प्रयोगसँगै शिक्षा प्रणालीलाई व्यावहारिक, गुणस्तरीय र मानवीय मूल्यमा आधारित बनाउनुपर्ने बताएका छन्। शनिबार पशुपति मित्र माध्यमिक विद्यालयको हीरक जयन्ती समारोहलाई सम्बोधन गर्दै राष्ट्रपति पौडेलले विद्यार्थीलाई परीक्षामा राम्रो अङ्क ल्याउने प्रतिस्पर्धामा मात्र सीमित नराखी राष्ट्रप्रति जिम्मेवार, सिर्जनशील र समस्या समाधान गर्न सक्ने नागरिकका रूपमा विकास गर्नुपर्ने बताएका हुन्।
उनले विज्ञान, प्रविधि र कृत्रिम बुद्धिमत्ताको तीव्र विकासले विश्वमा नयाँ अवसर र चुनौती सिर्जना गरिरहेको उल्लेख गर्दै शिक्षा प्रणालीलाई समयअनुकूल परिमार्जन गर्न आवश्यक रहेको बताए।
शिक्षा केवल सैद्धान्तिक ज्ञान हासिल गर्ने वा राम्रो अङ्क प्राप्त गर्ने माध्यम मात्र नभएको उनको भनाइ थियो। आधुनिक ज्ञान र सीपसँगै विद्यार्थीमा मानवीय विवेक, जिम्मेवारीबोध, संवेदनशीलता, सहिष्णुता र सामाजिक सद्भावको विकास गर्नुपर्नेमा उनले जोड दिए।
राष्ट्रपति पौडेलले विद्यालय तहदेखि नै विद्यार्थीमा राष्ट्रियताको भावना, सामाजिक मूल्य–मान्यता र राष्ट्रप्रतिको जिम्मेवारी विकास गर्नुपर्ने बताए। प्रविधिको प्रयोग बढ्दै जाँदा मानवीय संवेदना र नैतिक मूल्यलाई पनि शिक्षाको केन्द्रमा राख्नुपर्ने उनको धारणा थियो।
उनले भविष्यको शिक्षालाई गुणस्तरीय, व्यावहारिक र जीवनोपयोगी बनाउन सरकार, नीतिनिर्माता, शिक्षक, अभिभावक, विद्यालय र समुदायबीच प्रभावकारी सहकार्य आवश्यक रहेको उल्लेख गरे।
विगतका अनुभव र उपलब्धिलाई आधार बनाएर शिक्षा क्षेत्रमा सुधार गर्नुपर्ने बताउँदै राष्ट्रपति पौडेलले विद्यार्थीको सर्वाङ्गीण विकासका लागि सम्बन्धित सबै पक्षले समन्वयात्मक भूमिका निर्वाह गर्नुपर्नेमा जोड दिए।
Discussion about this post