ललितपुर । नेपालको डिजिटल भुक्तानी सञ्जाल फोनपेले डिजिटल अर्थतन्त्रमा योगदान पुर्याउने व्यक्ति तथा संस्थाको सम्मान र नवप्रवर्तनलाई प्रोत्साहन गर्ने उद्देश्यले पहिलोपटक ‘फोनपे अनर्स २०८३’ आयोजना गरेको छ।
काठमाडौंस्थित द सोल्टीमा आयोजित कार्यक्रममा नियामक निकाय, बैंक तथा वित्तीय संस्था, फिनटेक कम्पनी, व्यवसायी, प्रविधि साझेदार, सञ्चारमाध्यम तथा डिजिटल इन्फ्लुएन्सरसहित ४०० भन्दा बढी प्रतिनिधिको सहभागिता रहेको थियो।
कार्यक्रममा पूर्वअर्थमन्त्री रामेश्वर खनाल प्रमुख अतिथिका रूपमा सहभागी भएका थिए। उनले डिजिटल भुक्तानी नेपालको वित्तीय तथा आर्थिक क्षेत्रमा महत्त्वपूर्ण बन्दै गएको उल्लेख गर्दै नवप्रवर्तन, सहकार्य र जिम्मेवार विकासलाई प्राथमिकता दिनुपर्ने बताए।
कार्यक्रमअघि फोनपेले डिजिटल भुक्तानीलाई सहज, स्मार्ट र पहुँचयोग्य बनाउने उद्देश्यले विभिन्न नयाँ सुविधा सार्वजनिक गरेको थियो।
सार्वजनिक गरिएका सुविधामध्ये ‘अटोपे’ ले नियमित भुक्तानी स्वचालित रूपमा गर्न सहयोग गर्नेछ भने ‘फोनपे सर्कल’ ले समूहमा हुने खर्च व्यवस्थापन तथा रकम बाँडफाँटलाई सहज बनाउनेछ।
त्यस्तै, ‘टक टु पे’ मार्फत आवाजको निर्देशनबाट भुक्तानी गर्न सकिने सुविधा प्रस्तुत गरिएको छ। फोनपे बिजनेस एपलाई पुनः ब्रान्डिङ गरी ‘फोनबिज’ नाम दिइएको छ। यसले व्यवसायीलाई भुक्तानी व्यवस्थापन, कर्मचारीको तलब तथा विक्रेतालाई रकम भुक्तानी, व्यावसायिक प्रतिवेदन, कर्जाका लागि आवेदन र लोयल्टी कार्यक्रमजस्ता सुविधा एउटै प्लेटफर्मबाट उपलब्ध गराउने कम्पनीले जनाएको छ।
फोनपे अनर्सलाई नेपालको डिजिटल भुक्तानी क्षेत्रमा उत्कृष्टता, सहकार्य र नवप्रवर्तनलाई प्रोत्साहन गर्ने वार्षिक मञ्चका रूपमा अघि बढाउने कम्पनीको उद्देश्य रहेको छ।
Discussion about this post