काठमाडौं । नेपाली कांग्रेसका नवनिर्वाचित सभापति गगनकुमार थापाले नागरिकको विश्वास पुनःस्थापित गर्ने गरी पार्टीलाई रूपान्तरण गर्ने प्रतिबद्धता व्यक्त गरेका छन्।
शनिबार पार्टी कार्यालय सानेपामा कार्यकर्ता तथा समर्थकलाई सम्बोधन गर्दै थापाले सभापतिको जिम्मेवारीलाई अधिकार नभई जवाफदेहिताका रूपमा लिएको बताए। नेतृत्व परिवर्तन हुँदैमा पार्टी नबदलिने उल्लेख गर्दै उनले काम गर्ने शैली, जिम्मेवारी र जवाफदेहितामा परिवर्तन आवश्यक रहेको बताए।
महाधिवेशनमा प्रतिस्पर्धा भए पनि अब सबै नेता तथा कार्यकर्ता एकजुट भएर नागरिकको विश्वास जित्न लाग्नुपर्ने उनको भनाइ थियो। सभापतिमा प्रतिस्पर्धा गरेका श्यामकृष्ण खड्गीसहित सबैलाई साथमा लिएर अघि बढ्ने उनले बताए।
थापाले किसान, उद्योगी, व्यवसायी तथा वैदेशिक रोजगारीमा रहेका नेपालीले समेत भरोसा गर्ने पार्टी निर्माण गर्ने प्रतिबद्धता जनाए। कांग्रेसलाई माया गर्ने शुभेच्छुकलाई पुनः पार्टीसँग जोड्न काम गर्ने शैली बदल्नुपर्नेमा उनले जोड दिए।
उनले कांग्रेस गलत व्यक्तिको पक्षमा नउभिने र कसैको अनुचित भार नबोक्ने स्पष्ट पारे। कानुन सबैका लागि समान हुनुपर्ने उल्लेख गर्दै गल्ती गर्ने व्यक्तिले त्यसको जवाफदेहिता आफैँ लिनुपर्ने उनको भनाइ थियो।
महाधिवेशनबाट पारित प्रतिवेदन अध्ययन गरी प्राप्त सुझावका आधारमा पहिलो केन्द्रीय कार्यसमिति बैठकबाट कार्ययोजना बनाइने पनि थापाले जानकारी दिए। पार्टीप्रति नागरिकको विश्वास फर्काउने र कामबाटै परिवर्तन प्रमाणित गर्ने आफ्नो लक्ष्य रहेको उनले बताए।
Discussion about this post