काठमाण्डौ — नेपाल प्रिमियर लिग (एनपीएल) को तेस्रो संस्करण नजिकिँदै गर्दा नेपाल क्रिकेट सङ्घ (क्यान) अन्तर्राष्ट्रिय क्रिकेट परिषद् (आईसीसी) को औपचारिक स्वीकृतिको प्रतीक्षामा छ।
एनपीएललाई अन्तर्राष्ट्रिय मान्यता दिलाउन आवश्यक कागजात आईसीसीमा पठाइसकिएको क्यानले जनाएको छ। अब आईसीसीको निर्णयपछि विदेशी खेलाडीको अनुबन्ध र सहभागितालाई औपचारिकता दिने तयारी छ।
क्यानका सचिव पारस खड्काका अनुसार अधिकांश टोलीले विदेशी खेलाडीलाई सम्पर्क गरी प्रारम्भिक सहमति गरिसकेका छन्। तर आईसीसीको स्वीकृति नआएसम्म खेलाडीको औपचारिक घोषणा गर्न समस्या भइरहेको छ।
आईसीसीको स्वीकृति पाएपछि टेस्ट राष्ट्रका चर्चित खेलाडीलाई एनपीएलमा ल्याउन सहज हुने क्यानको अपेक्षा छ। यसपटक डेविड वार्नर, मोइन अली, सिकन्दर राजा र इफ्तिखार अहमदलगायत चर्चित विदेशी खेलाडी एनपीएलसँग जोडिने तयारीमा छन्।
एनपीएल टोली जनकपुर बोल्ट्सका प्रमुख कार्यकारी अधिकृत निरोज खतिवडाले पनि आईसीसीबाट छिट्टै सकारात्मक निर्णय आउने अपेक्षा व्यक्त गर्नुभएको छ। स्वीकृति पाएपछि थप विदेशी स्टार खेलाडीलाई टोलीमा भित्र्याउन सहज हुने उहाँको भनाइ छ।
क्यानले एनपीएललाई नेपाली क्रिकेटको विकाससँगै खेल पर्यटन प्रवद्र्धनको माध्यमका रूपमा समेत अघि बढाउने लक्ष्य राखेको छ। विदेशी खेलाडी, अम्पायर तथा कमेन्टेटरको नेपाल आगमनले अन्तर्राष्ट्रियस्तरमा नेपालको पर्यटन र सकारात्मक पहिचान प्रवद्र्धन गर्न सहयोग पुग्ने क्यानको विश्वास छ।
एनपीएलको तेस्रो संस्करण कात्तिक ९ गतेदेखि काठमाडौंस्थित त्रिभुवन विश्वविद्यालय क्रिकेट मैदानमा सुरु हुँदैछ। फाइनल खेल मंसिर ५ गते हुनेछ। प्रतियोगितामा आठ टोलीबीच प्रतिस्पर्धा हुनेछ।
उद्घाटन खेलमा गत संस्करणको विजेता लुम्बिनी लायन्स र उपविजेता सुदूरपश्चिम रोयल्सबीच प्रतिस्पर्धा हुने तालिका छ।
Discussion about this post