काठमाडौँ । अर्थमन्त्री एवं एसियाली पूर्वाधार लगानी बैंक (एआईआईबी) का लागि नेपालका गभर्नर डा. स्वर्णिम वाग्लेले नेपालमा बैंकको लगानी विस्तार गर्न एआईआईबी अध्यक्ष जोउ जियायीलाई आग्रह गरेका छन्।
दोहामा भएको भेटवार्तामा अर्थमन्त्री वाग्लेले प्राकृतिक विपद्पछिको पुनर्निर्माण, सहुलियतपूर्ण वित्तीय पहुँच तथा हरित ऊर्जा, विद्युत् प्रसारण, सडक र डिजिटल पूर्वाधारमा लगानी बढाउन आग्रह गरेका हुन्।
भेटमा एआईआईबी अध्यक्ष जोउले भोटेकोशी बाढीबाट भएको क्षतिप्रति समवेदना व्यक्त गर्दै विपद्पछिको पुनर्निर्माणमा बैंकबाट सहयोग गर्ने प्रतिबद्धता जनाइन्।
उनले परियोजना तयारीका लागि अनुदान उपलब्ध गराउने तथा विशेष कोषमार्फत नेपाललाई सहुलियतपूर्ण ब्याजदरमा ऋण उपलब्ध गराउन सकिने बताइन्।
अर्थमन्त्री वाग्लेले एआईआईबीको लगानीमा सञ्चालित विद्युत् वितरण प्रणाली सुधार तथा विस्तार आयोजना र एक्सप्रेस सडकको अध्ययन शीघ्र सम्पन्न गर्न आग्रह गरे। साथै, माथिल्लो त्रिशूली–१ जलविद्युत् आयोजनामा बाढीले पुर्याएको क्षतिप्रति दुःख व्यक्त गरे।
भेटका क्रममा अर्थमन्त्री वाग्लेले अध्यक्ष जोउलाई सन् २०२६ भित्र नेपाल भ्रमणको निम्तोसमेत दिएका छन्।
Discussion about this post