महेन्द्रनगर । कञ्चनपुरको भीमदत्त नगरपालिका–३ स्थित महाकाली मोडर्न पब्लिक स्कुलले कक्षा ११ र १२ मा अध्ययनरत विद्यार्थीलाई जिल्ला प्रहरी कार्यालय कञ्चनपुरको अध्ययन भ्रमण गराएको छ।
विद्यालयले शुक्रबार विद्यार्थीलाई जिल्ला प्रहरी कार्यालयमा लगेर प्रहरीबाट प्रदान गरिने सेवा–सुविधा, कार्यालयको कार्यप्रणाली तथा प्रहरीका विभिन्न जिम्मेवारीबारे प्रत्यक्ष जानकारी गराएको हो।
अध्ययन भ्रमणका क्रममा विद्यार्थीले प्रहरी कार्यालयको कार्यप्रणाली, नागरिकलाई प्रदान गरिने सेवा तथा शान्ति–सुरक्षा कायम गर्न प्रहरीले निर्वाह गर्ने भूमिकाबारे जानकारी लिएका थिए। साथै, विभिन्न घटनाको अनुसन्धान, समन्वय तथा प्रहरी प्रशासन र समुदायबीचको सम्बन्धका विषयमा पनि विद्यार्थीले जानकारी प्राप्त गरेका थिए।
विद्यालयका संस्थापक प्रिन्सिपल दिजराज भट्टले कक्षाकोठामा अध्ययन गरेका विषयवस्तुलाई व्यवहारिक रूपमा बुझाउन तथा विद्यार्थीलाई प्रहरीको कामकारबाहीबारे प्रत्यक्ष ज्ञान प्रदान गर्ने उद्देश्यले अध्ययन भ्रमण आयोजना गरिएको बताउनुभयो।
कक्षा १२ मा अध्ययनरत छात्रा पूर्णिमा कार्कीले प्रहरी कार्यालयबाट प्रदान गरिने सेवा–सुविधाका विषयमा प्रत्यक्ष जानकारी पाएको बताउँदै यस्तो कार्यक्रम आयोजना गरेकोमा विद्यालयलाई धन्यवाद दिइन्।
भ्रमणका क्रममा विद्यार्थीले प्रहरी कार्यालयका विभिन्न शाखा तथा सेवाबारे जानकारी लिनुका साथै प्रहरी कर्मचारीसँग अन्तरक्रियासमेत गरेका थिए।
विद्यालयले यस्ता अध्ययन भ्रमणले विद्यार्थीको ज्ञान, व्यवहारिक अनुभव तथा सामाजिक जिम्मेवारीबोध अभिवृद्धि गर्न सहयोग पुग्ने जनाएको छ।
Discussion about this post