कञ्चनपुर । शिक्षा युवा क्लबले भीमदत्त नगरपालिकाका १९ वटै वडालाई समेटेर सरसफाइ अभियान सञ्चालन गरिरहेको छ। क्लबले साउन ९ गतेदेखि सुरु गरेको अभियानअन्तर्गत विभिन्न वडामा सरसफाइ कार्यक्रम सम्पन्न गरेको हो।
अभियानअन्तर्गत साउन १० गते वडा नम्बर १०, १६ गते वडा नम्बर ५, १७ गते वडा नम्बर ११, १८ गते वडा नम्बर १२, २३ गते वडा नम्बर १७ र २४ गते वडा नम्बर १४ मा सरसफाइ अभियान सञ्चालन गरिएको थियो।
आज साउन ३० गते भीमदत्त नगरपालिका–१३ मा सरसफाइ अभियान सञ्चालन गरिएको छ। कार्यक्रममा वडा अध्यक्ष, इलाका प्रहरी कार्यालयका सुरक्षाकर्मी तथा स्थानीय बासिन्दाको सहभागिता रहेको थियो।
क्लबले युवाको सक्रियतामा सञ्चालन भइरहेको अभियानमार्फत सार्वजनिक स्थल तथा आसपासको क्षेत्रमा सरसफाइ गर्दै स्वच्छ र सफा वातावरण निर्माणका लागि समुदायलाई समेत सचेत गराउँदै आएको जनाएको छ। अभियानलाई भीमदत्त नगरपालिकाका बाँकी वडामा समेत निरन्तरता दिइने क्लबले जनाएको छ।
Discussion about this post