कञ्चनपुर । कञ्चनपुरको सार्क एजुकेसन फाउन्डेसनले विद्यार्थीलाई सुदूरपश्चिमको मौलिक संस्कृति र पहिचानसँग जोड्ने उद्देश्यले महिनाको अन्तिम शुक्रबार मौलिक पहिरन लगाउने कार्यको सुरुवात गरेको छ।
विद्यार्थीमा स्थानीय संस्कृति, परम्परा र मौलिक पहिरनप्रति अपनत्व बढाउने उद्देश्यले यस्तो कार्य सुरु गरिएको विद्यालयले जनाएको छ। अब महिनाको अन्तिम शुक्रबार विद्यार्थीहरू सुदूरपश्चिमका मौलिक पहिरन लगाएर विद्यालय आउनेछन्।
फाउण्डेसनका प्लस टू संयोजक राजेश भण्डारीले विद्यार्थीलाई किताबी ज्ञानसँगै आफ्नो मौलिक संस्कृति र पहिचानबारे व्यवहारिक रूपमा परिचित गराउन महिनाको अन्तिम शुक्रबार मौलिक पहिरन लगाउने कार्य सुरु गरिएको बताए। उनका अनुसार यसले विद्यार्थीमा आफ्नो संस्कृति संरक्षणप्रतिको भावना विकास गर्नुका साथै मौलिक पहिरनको पुस्तान्तरणमा समेत सहयोग पुग्नेछ।
विद्यालयले आगामी दिनमा स्थानीय कला, संस्कृति, भाषा तथा परम्परासँग सम्बन्धित गतिविधिलाई समेत प्राथमिकता दिँदै जाने जनाएको छ।
Discussion about this post