काठमाडौं । आन्तरिक राजस्व कार्यालय जुम्लाले आर्थिक वर्ष २०८२/८३ मा रु ४८ करोडभन्दा बढी राजस्व सङ्कलन गरेको छ। कार्यालयले रु ६४ करोड ४८ लाख ७४ हजार राजस्व सङ्कलन गर्ने लक्ष्य राखेकोमा रु ४८ करोड १ लाख २२ हजार सङ्कलन गर्दै लक्ष्यको ७४ दशमलव ४५ प्रतिशत प्रगति हासिल गरेको हो।
आन्तरिक राजस्व कार्यालय जुम्लाका प्रमुख कर अधिकृत प्रभात घिमिरेका अनुसार सङ्कलित राजस्वमध्ये आयकरबाट रु ३५ करोड ८१ लाख ५२ हजार, मूल्य अभिवृद्धि कर (मु.अ.कर) बाट रु ९ करोड ८८ लाख ९ हजार, अन्तःशुल्कबाट रु ८८ लाख ५८ हजार र अन्य शीर्षकबाट रु १ करोड ४३ लाख ३ हजार सङ्कलन भएको छ।
कार्यालयले करदाता शिक्षालाई प्रभावकारी बनाउँदै निर्माण व्यवसायीसहित ठूला तथा साना व्यवसायीलाई लक्षित गरी करदाता सेवासम्बन्धी कार्यक्रम सञ्चालन गर्दै आएको जनाएको छ। कर कानुनअनुसार राजस्व सङ्कलन, कर परीक्षण तथा अनुसन्धान र कर कानुनको परिपालना गराउने कार्यसँगै अन्तःशुल्कसम्बन्धी गतिविधिसमेत सञ्चालन भइरहेको कार्यालयले जनाएको छ।
गत आर्थिक वर्षको वैशाखदेखि असारसम्म कार्यालयले ७४ पटक बजार अनुगमन गरेको थियो। सो अवधिमा सातवटा अग्रिम करकट्टी परीक्षण, एकवटा पूर्ण कर परीक्षण, २० वटा द्रुत कर परीक्षण, १९ वटा सङ्कलन भ्रमण तथा पाँचपटक करदाता शिक्षा कार्यक्रम सञ्चालन गरिएको कार्यालयले जनाएको छ।
कार्यालयका अनुसार चालु आर्थिक वर्षमा आयकर सङ्कलन अघिल्लो वर्षको तुलनामा केही बढेको भए पनि मूल्य अभिवृद्धि कर सङ्कलनमा भने कमी आएको छ। व्यापार–व्यवसायमा देखिएको मन्दी तथा विकास निर्माणका सरकारी निकायमा पुँजीगत खर्च न्यून हुँदा मूल्य अभिवृद्धि कर सङ्कलन प्रभावित भएको कार्यालयको भनाइ छ।
हालसम्म जुम्लामा मूल्य अभिवृद्धि करतर्फ १ हजार ७५०, आयकरतर्फ १७ हजार ८४ र अन्तःशुल्कतर्फ ५६५ करदाता दर्ता भएका छन्।
आन्तरिक राजस्व कार्यालय जुम्लाको कार्यक्षेत्र जुम्लासहित मुगु र कालीकोटसम्म रहेको छ। कार्यालयको समन्वयमा कालीकोटको तिलागुफा र रास्कोट नगरपालिकाबाट समेत करदाता सेवा सञ्चालन हुँदै आएको छ।
कार्यालयले आर्थिक वर्ष २०८१/८२ मा रु ५१ करोड ४१ लाख राजस्व सङ्कलन गरेको थियो।
Discussion about this post